UP Election 2022: మరికొద్ది రోజుల్లో ఉత్తర్ప్రదేశ్ ఎన్నికలు జరగనున్న నేపథ్యంలో ఆ రాష్ట్రంలో పార్టీలు జోరుగా ప్రచారం చేస్తున్నాయి. సమాజ్వాదీ పార్టీ అధినేత అఖిలేశ్ యాదవ్ కూడా విస్తృతం ప్రచారంలో పాల్గొంటున్నారు. అయితే ఇటీవల ఆయన ఎక్కడికి వెళ్లినా ఓ చిన్న ఎర్రటి మూటను జేబులో పెట్టుకుని వెంట తీసుకెళ్తున్నారు. ఆ మూటలో ఏముంది? అసలు దానిని అఖిలేశ్ వెంట ఎందుకు తీసుకెళ్తున్నారు? అనే విషయంపై రాజకీయ వర్గాల్లో ఆసక్తి నెలకొంది.
పార్టీ ప్రచారంలో భాగంగా గాజియాబాద్లో అఖిలేశ్ యాదవ్ శనివారం పర్యటించారు. ఈ సందర్భంగా రాష్ట్రీయ లోక్దళ్ అధినేత జయంత్ చౌదరితో కలిసి నిర్వహించిన మీడియా సమావేశంలో ఈ మూట వెనుక రహస్యాన్ని వెల్లడించారు. ఈ మూటలో అన్నం ఉందని తెలిపారు. భాజపాను గద్దెదించాలనే లక్ష్యంతో ఉన్న అఖిలేశ్.. యూపీలో ఆ పార్టీ ఓటమి చవిచూసే వరకు పోరాటం ఆపమని ఆ అన్నంపై ప్రమాణం చేసినట్లు చెప్పుకొచ్చారు. తమ నేతలతో కూడా ఈ మూటపై ప్రమాణం చేయిస్తున్నట్లు తెలిపారు.
ఈ సందర్భంగా జయంత్ చౌదరితో కలిసి మరోసారి ఆ ఎర్రమూటపై ప్రమాణం చేశారు అఖిలేశ్ యాదవ్.
"ఈ ప్రచారంలో నేను ఓ ఎర్ర మూటను వెంట తీసుకెళ్తున్నాను. ఇందులో అన్నం ఉంది. నేతలతో అన్నంపై ప్రమాణం చేయించేందుకు నేను దీనిని తీసుకెళ్తాను. ఇదే అన్నంపై ఆధారపడి మనం జీవిస్తున్నాం. ఈ సందర్భంగా భాజపాను గద్దెదించే వరకు పోరాటం ఆపమని మేము ఇద్దరం సంయుక్తంగా ప్రమాణం చేస్తున్నాం."
-అఖిలేశ్ యాదవ్, సమాజ్వాదీ పార్టీ అధినేత
రైతులకు అన్యాయం చేసిన భాజపా ప్రభుత్వాన్ని ఓడించడమే తమ లక్ష్యమన్నారు అఖిలేశ్ యాదవ్.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి : 'టీకా తీసుకుంటే నా 8 మంది పిల్లలేంగాను?'.. వీడియో వైరల్
