Atiq Ahmed Son Asad Ahmed Encounter : ఉత్తర్ప్రదేశ్ గ్యాంగ్స్టర్, రాజకీయ నేత అతిఖ్ అహ్మద్ కుమారుడు అసద్ ఎన్కౌంటర్లో హతమయ్యాడు. ఝాన్సీలో యూపీ స్పెషల్ టాస్క్ ఫోర్స్తో గురువారం జరిగిన కాల్పుల్లో అతడు మరణించాడు. అసద్తోపాటు గులామ్ అనే మరొక వ్యక్తి కూడా ఎన్కౌంటర్లో చనిపోయాడు. ప్రయాగ్రాజ్కు చెందిన న్యాయవాది ఉమేశ్ పాల్ హత్య కేసులో వీరిద్దరిపై రూ.5లక్షలు చొప్పున రివార్డు ఉంది. మృతుల నుంచి అధునాతన విదేశీ ఆయుధాలు స్వాధీనం చేసుకున్నట్లు పోలీసులు తెలిపారు.
ఉమేశ్ పాల్ కిడ్నాప్ కేసులో అతిఖ్ అహ్మద్కు ఇప్పటికే జీవిత ఖైదు పడింది. ప్రస్తుతం ఆయన జైలులో ఉన్నాడు. ఉమేశ్ పాల్ హత్య కేసుకు సంబంధించి గురువారం అతిఖ్ను, అతడి సోదరుడు అష్రఫ్ను ప్రయాగ్రాజ్లోని కోర్టుకు తీసుకువచ్చారు. వారు న్యాయస్థానంలో ఉండగానే అసద్ ఎన్కౌంటర్ సమాచారం తెలిసింది. వెంటనే అతిఖ్ కోర్టులోనే తీవ్ర భావోద్వేగానికి లోనైనట్లు తెలిసింది.
అసద్, గులాం ఎన్కౌంటర్పై ఉమేశ్ పాల్ కుటుంబ సభ్యులు హర్షం వ్యక్తం చేశారు. తమ కుమారుడికి న్యాయం జరిగిందని ఉమేశ్ తల్లి శాంతి దేవి ప్రయాగ్రాజ్లో వ్యాఖ్యానించారు. ఇందుకు ఉత్తర్ప్రదేశ్ ముఖ్యమంత్రి యోగి ఆదిత్యనాథ్కు ధన్యవాదాలు తెలిపారు. ఉమేశ్ భార్య కూడా ఇదే తరహాలో స్పందించారు. మరోవైపు.. అసద్, గులాం ఎన్కౌంటర్ నేపథ్యంలో యూపీ పోలీసులకు ఆ రాష్ట్ర ఉపముఖ్యమంత్రి కేశవ్ ప్రసాద్ మౌర్య అభినందనలు తెలిపారు. "నిందితులు దాడి చేశాక.. పోలీసులు ఎదురు కాల్పులు జరిపారు. ఇది నవ భారతం అనే సందేశం.. ఈ ఎన్కౌంటర్ ద్వారా నేరస్థులకు వెళ్తుంది. యూపీలో యోగి ప్రభుత్వం నడుస్తోంది. నేరస్థులకు రక్షణ కల్పించే సమాజ్వాదీ పార్టీ ప్రభుత్వం కాదు." అని అన్నారు మౌర్య.
ఇదీ కేసు..
2005లో బీఎస్పీ ఎమ్మెల్యే రాజు పాల్ హత్యకు గురయ్యారు. ఈ కేసులో అతిఖ్ అహ్మద్ ప్రధాన నిందితుడు. ఈ కేసులో ప్రధాన సాక్షి అయిన న్యాయవాది ఉమేశ్ పాల్.. 2006లో కిడ్నాప్నకు గురయ్యారు. అనంతరం విడుదల అయ్యారు. అతిఖ్తో పాటు మరికొందరిపై 2007లో ఉమేశ్ పాల్ కేసు పెట్టాడు. విచారణ కొనసాగుతూ ఉండగానే 2023 ఫిబ్రవరి 24న ఉమేశ్ హత్యకు గురయ్యారు. ప్రయాగ్రాజ్లోని ధూమన్గంజ్ ప్రాంతంలోని ఉమేశ్ ఇంటి వద్ద.. ఆయనతోపాటు ఇద్దరు పోలీసు సెక్యూరిటీ గార్డులను దుండగులు కాల్చి చంపారు. ఉమేశ్ భార్య ఇచ్చిన ఫిర్యాదు మేరకు ఫిబ్రవరి 25న పోలీసులు కేసు నమోదు చేశారు. అతిఖ్ అహ్మద్, అతడి సోదడురు అష్రఫ్ అహ్మద్, అతిఖ్ కుమారుడు అసద్, మక్సూదన్ కుమారుడు గులాం సహా మరికొందరిని నిందితులుగా పేర్కొన్నారు. పరారీలో ఉన్న అసద్, గులాంపై పోలీసులు రూ.5లక్షలు రివార్డు ప్రకటించారు. డిప్యూటీ ఎస్పీ నవేందు, విమల్ నేతృత్వంలోని ఉత్తర్ప్రదేశ్ స్పెషల్ టాస్క్ఫోర్స్ బృందం గాలింపు చర్యలు చేపట్టగా.. గురువారం ఝాన్సీలో ఎన్కౌంటర్ జరిగింది. ఈ కాల్పుల్లో అసద్, గులాం మరణించారు.
