UGC New Guidelines to Colleges and Universities: కాలేజీ విద్యార్థులకు గుడ్​న్యూస్​.. UGC కీలక ఉత్తర్వులు!

UGC New Guidelines to Colleges and Universities: విద్యార్థులకు యూనివర్సిటీ గ్రాంట్​ కమిషన్​(UGC) శుభవార్త చెప్పింది. రెండు కీలక విషయాలకు సంబంధించి.. కాలేజీలకు, యూనివర్సిటీలకు పలు ఆదేశాలు జారీ చేసింది. అవి ఏంటో ఈ కథనంలో తెలుసుకుందాం.

UGC Good News to College Students: విద్యార్థులు కాలేజీల్లో చేరే సమయంలో.. వారి ఒరిజినల్​ సర్టిఫికెట్లను మెజారిటీ కాలేజీ యాజమాన్యాలు తీసుకుంటాయన్న సంగతి తెలిసిందే. అంతే కాకుండా.. ఏదైనా కారణంతో సదరు కళాశాలలో అడ్మిషన్​ క్యాన్సిల్​ చేసుకుంటే.. అడ్మిషన్ సమయంలో తీసుకున్న ఫీజును తిరిగి చెల్లించట్లేదు. దీంతో.. ప్రతి సంవత్సరమూ చాలా మంది విద్యార్థులు ఇబ్బందులు పడుతున్నారు. ఈ నేపథ్యంలోనే.. యూనివర్సిటీ గ్రాంట్​ కమిషన్(UGC) విద్యార్థులకు గుడ్​న్యూస్​ చెప్పింది. కాలేజీలు, యూనివర్సిటీలకు కూడా పలు హెచ్చరికలతో కూడిన ఆదేశాలు జారీ చేసింది.

అడ్మిషన్​ పొందిన విద్యార్థుల ఒరిజినల్​ డాక్యుమెంట్లను.. కాలేజీలు, యూనివర్సిటీలు తమ వద్ద ఉంచుకోవద్దని ఆదేశాలు జారీ చేసింది. అంతేకాకుండా.. అడ్మిషన్​ పొందిన విద్యార్థులు.. ఏదైనా కారణం చేత నెలలోపు అడ్మిషన్ ఉపసంహరించుకుంటే.. చెల్లించిన ఫీజును తిరిగి విద్యార్థికి ఇవ్వాలని స్పష్టం చేసింది. ఈ ఆదేశాలు ఉల్లంఘిస్తే.. చర్యలు తప్పవని హెచ్చరించింది.

రిఫండ్​ నింబధనలు (UGC Refund Rules) : UGC ప్రకారం.. ఒక విద్యార్థి అడ్మిషన్‌ ఉపసంహరించుకున్న సమయంలో.. దిగువ పేర్కొన్న నిబంధనల ప్రకారం విద్యా సంస్థలు ఫీజును వాపసు చేయాల్సి ఉంటుంది.

• అడ్మిషన్స్ ముగిసే చివరి తేదీకి (అధికారికంగా నోటిఫై చేసిన డేట్) 15 రోజుల కన్నా ముందు విద్యార్థులు అడ్మిషన్ క్యాన్సిల్ చేసుకుంటే.. వారికి 100 శాతం ఫీజు రిఫండ్​ చేయాలి.
• అడ్మిషన్స్ ముగిసే చివరి తేదీకి.. 15 రోజులలోపు క్యాన్సిల్ చేసుకుంటే.. 90 శాతం ఫీజు రిఫండ్​ చేయాలి.
• అడ్మిషన్స్ ముగిసిపోయిన తర్వాత.. 15 రోజుల్లోపు క్యాన్సిల్ చేసుకుంటే.. 80 శాతం ఫీజు రిఫండ్​ చేయాలి.
• అడ్మిషన్స్ ముగిసిపోయిన తర్వాత.. 16 రోజుల నుంచి 30 రోజుల మధ్య క్యాన్సిల్ చేసుకుంటే.. 70 శాతం ఫీజు రిఫండ్​ చేయాలి.
• అడ్మిషన్స్ ముగిసిపోయిన 30 రోజుల తర్వాత అడ్మిషన్‌ క్యాన్సిల్ చేసుకుంటే.. ఫీజు రిఫండ్​ చేయరు.

నిబంధనలు ఉల్లంఘిస్తే.. కాలేజీలపై చర్యలు..

యూజీసీ ప్రకారం.. ఈ ఆదేశాలను పాటించడంలో విఫలమైన విద్యాసంస్థలకు జరిమానా విధిస్తారు. అంతేకాదు.. UGC నుంచి ఎటువంటి సాయమూ అందదు. ఉన్నత విద్యాసంస్థల హోదా, అనుబంధం కూడా కోల్పోయే అవకాశం ఉంటుంది. ఇంకా.. తమ కళాశాలలకు సంబంధించిన వివరాలను యూజీసీ అధికారిక వెబ్​సైట్​లో నమోదు చేయాలి.

• విద్యాసంస్థ ప్రస్తుత స్థితి
• యూజీసీతో ఇన్స్టిట్యూట్ అనుబంధం ఏంటి?
• అక్రిడిటేషన్ స్థితి
• భౌతిక ఆస్తులు ఇంకా​ సౌకర్యాల వివరాలు
• కోర్సుల వారీగా విద్యార్థుల జాబితా
• మొత్తం కోర్సుకు చెల్లించాల్సిన ఫీజు
• అడ్మిషన్ చివరి తేదీ
• అధ్యాపకుల వివరాలు
• పాలకమండలి సభ్యులు
• ఆదాయ వనరులు
• ఆర్థిక పరిస్థితి

ఈ సమాచారాన్ని తప్పక అందించాలని UGC ఆదేశించింది. ఈ సమాచారం విద్యార్థులు అడ్మిషన్​ పొందే సమయంలో.. ఉపయోగపడుతుందని స్పష్టం చేసింది.

మంత్రి ఏమన్నారంటే..

విద్యార్థుల సర్టిఫికెట్లకు సంబంధించి కేంద్ర మంత్రి ప్రకాశ్​ జవదేకర్​ కీలక వ్యాఖ్యలు చేశారు. అడ్మిషన్​ ఫారమ్​ను సమర్పించే సమయంలో.. ఏ విద్యార్థి కూడా తమ మార్క్​షీట్​, స్కూల్​ లీవింగ్​ సర్టిఫికెట్​ వంటి ఒరిజనల్​ సర్టిఫికెట్లను కాలేజీలకు ఇవ్వాల్సిన అవసరం లేదన్నారు. స్టూడెంట్స్​ ఒరిజినల్​ సర్టిఫికెట్స్​ను ఏ సంస్థ కూడా తమ ఆధీనంలోకి తీసుకోకూడదని చెప్పారు. అంతే కాకుండా ఒకవేళ విద్యార్థి నోటిఫైడ్​ అడ్మిషన్​ చివరి తేదీకి 15 రోజుల ముందు అడ్మిషన్​ను ఉపసంహరించుకుంటే.. అతను లేదా ఆమె 100 శాతం రిఫండ్​కు అర్హులని స్పష్టం చేశారు.