జమ్ముకశ్మీర్లో ఉగ్రవాదుల ఏరివేత కొనసాగుతోంది. తాజాగా షోపియాన్ జిల్లాలో భద్రతా దళాలు, ముష్కరుల మధ్య ఎన్కౌంటర్ జరిగింది. ఈ క్రమంలో మొత్తం నలుగురు ఉగ్రవాదులను మట్టుబెట్టాయి బలగాలు.
జిల్లాలోని మనిహాల్ ప్రాంతంలో ముష్కరులు దాగి ఉన్నారన్న సమాచారం మేరకు నిర్బంధ తనిఖీలు చేపట్టాయి భద్రతా దళాలు. బలగాలపై కాల్పులకు పాల్పడ్డారు ఉగ్రవాదులు. ఇరువురి మధ్య జరిగిన ఎన్కౌంటర్లో మొదట ఇద్దరు తీవ్రవాదులను హతమార్చినట్లు కశ్మీర్ జోన్ పోలీసు అధికారులు తెలిపారు. ఆ తర్వాత అక్కడి నుంచి పారిపోయేందుకు యత్నించిన మరో ఇద్దరిని అదే ప్రాంతంలో మట్టుబెట్టినట్లు చెప్పారు.
ఎన్కౌంటర్ నేపథ్యంలో మనిహిల్ ప్రాంతంలో అంతర్జాల సేవలను నిలిపేశారు పోలీసులు.
స్థానికులు తెలిపిన వివరాల ప్రకారం.. ఆర్మీకి చెందిన 34వ రాష్ట్రీయ రైఫిల్స్, సీఆర్పీఎఫ్కు చెందిన 178వ బెటాలియన్ బలగాలు తనిఖీల్లో పాల్గొన్నాయి. ఆదివారం రాత్రి 9.30 గంటలకు ప్రారంభించి అర్ధరాత్రి వరకు ప్రతి ఇంటిని జల్లెడ పట్టారు జవాన్లు. ఈ క్రమంలో ముష్కరులు కాల్పులకు పాల్పడగా ఎన్కౌంటర్కు దారితీసింది.
కాల్పుల్లో హతమైన ఇద్దరు ముష్కరులు లష్కరే తోయిబా ఉగ్రవాద సంస్థకు చెందినవారిగా గుర్తించినట్లు చెప్పారు అధికారులు. మరో ఇద్దరి గుర్తింపు తెలియాల్సి ఉందన్నారు. ఉగ్రవాదుల ఏరివేత కోసం గాలింపు కొనసాగుతున్నట్లు తెలిపారు.
