మహారాష్ట్ర ముఖ్యమంత్రి ఏక్నాథ్ శిందే నకిలీ సంతకంతో ఓ వ్యాపారికి భారీగా టోకరా పెట్టారు ఇద్దరు మోసగాళ్లు. వ్యాపారి నుంచి విడతల వారీగా రూ.1.31 కోట్లు తీసుకున్నారు. నిందితులపై వాలివ్ పోలీస్ స్టేషన్లో వ్యాపారి ఫిర్యాదు చేశాడు. నిందితులను జతిన్ పవార్, శుభమ్ వర్మగా పోలీసులు గుర్తించారు. వీరిద్దరూ నల్సపరాకు చెందినవారని తెలిపారు.
ప్రభుత్వ ఈ-పోర్టల్లో పార్టనర్షిప్ ఇప్పిస్తామని నమ్మించి వ్యాపారి గోపాని నుంచి నిందితులు మొదట రూ.లక్ష వసూలు చేశారు. అనంతరం విడతలవారీగా మొత్తం రూ.1.31 కోట్లు తీసుకున్నారు. ఈ క్రమంలో ఆగస్టు 25న నిందితులు ఈ-పోర్టల్ ఫ్రాంచైజీ కోసం లైసెన్స్, పర్మిట్, ఇతర రుసుములకు సంబంధించిన పేమెంట్ స్లిప్‌ను గోపానికి ఇచ్చారు. ఈ పేమెంట్ రసీదులు.. రాష్ట్ర ఎక్సైజ్ శాఖ జారీ చేసిందని వ్యాపారితో తెలిపారు. అయితే ఈ రసీదులో సీఎం ఏక్నాథ్ శిందే సంతకం ఇంగ్లీష్లో ఉంది. సీఎం సంతకంపై అనుమానం వచ్చిన గోపాని.. వాలివ్ పోలీసులను అశ్రయించాడు. నిందితులపై పలు సెక్షన్ల కింద పోలీసులు కేసు నమోదు చేసుకున్నారు. వారి కోసం గాలిస్తున్నామని తెలిపారు.
ఇవీ చదవండి: గుజరాత్లో కేజ్రీవాల్కు చేదు అనుభవం.. వాటర్ బాటిల్తో దాడి!
ఎలక్ట్రిక్ బైక్ బ్యాటరీ పేలి చిన్నారి మృతి.. ఛార్జింగ్ అవుతుండగానే..
