లష్కర్-ఏ-తోయిబా(ఎల్ఈటీ) ముఠా కోసం పనిచేసే ఇద్దరు అనుచరులను కశ్మీర్ పోలీసులు అరెస్ట్ చేశారు. గ్రెనేడ్ దాడి కేసుకు సంబంధాలు ఉన్నట్లు గుర్తించిన బలగాలు.. బారముల్లా జిల్లా సోపోర్ ప్రాంతంలో ఇరువురిని పట్టుకున్నాయి.
2020, డిసెంబర్ 12న సోపోర్ ప్రాంతంలోని పోలీస్ పోస్ట్ బస్టాండ్ గేట్ వద్ద గ్రెనేడ్ దాడి జరిగింది. ఈ ఘటనలో ముగ్గురు పౌరులు గాయపడ్డారు. దీనిపై కేసు నమోదు చేసిన కశ్మీర్ పోలీసులు.. దర్యాప్తు చేపట్టారు. ఈ క్రమంలో కేసుతో సంబంధాలు ఉన్నట్లు అనుమానిస్తున్న నూర్ బాఘ్ సోపోర్కు చెందిన మోహమ్మద్ అసిఫ్ నజర్, గ్రీన్టౌన్ సోపోర్కు చెందిన సాహిల్ రషీద్ భట్లను అరెస్ట్ చేశారు.
వారిని ప్రశ్నించగా.. లష్కర్-ఏ-తోయిబా కోసం క్షేత్రస్థాయిలో పనిచేస్తున్నట్లు ఒప్పుకున్నారని పోలీసులు తెలిపారు. ఎల్ఈటీ ఉగ్రవాదుల సూచనల మేరకే పోలీసు పోస్ట్ వద్ద గ్రెనేడ్ దాడి చేసినట్లు వెల్లడించారని చెప్పారు. మిలిటెంట్ ర్యాంక్లో చేరాలనుకుంటున్నట్లూ తెలిపారని, పోలీస్, భద్రతా బలగాలపై దాడి చేయాలని గ్రెనేడ్లు తమకు అందాయని ఒప్పుకున్నట్లు వెల్లడించారు.
ఇదీ చూడండి: 'లష్కరే ముస్తఫా' చీఫ్ హిదాయతుల్లా అరెస్ట్
