క్యాపిటల్ భవనంలో హింస నేపథ్యంలో అమెరికా అధ్యక్షుడు డొనాల్డ్ ట్రంప్పై తీవ్ర అసహనంతో ఉన్న డెమొక్రాట్లు.. ఆయనపై అభిశంసన అస్త్రాన్ని ప్రయోగించేందుకు సన్నద్ధమవుతున్నారు. బుధవారం అభిశంసనకు సంబంధించి ప్రతినిధుల సభలో ఓటింగ్ జరిగే అవకాశముంది. ఇదే జరిగితే.. పదవీకాలంలో రెండోసారి అభిశంసన ఎదుర్కొన్న తొలి అధ్యక్షుడిగా.. అమెరికా చరిత్రలో నిలిచిపోతారు ట్రంప్. ఇప్పటికే ఓసారి అభిశంసనను ఎదుర్కొన్న ట్రంప్.. రిపబ్లికన్ల మద్దతుతో సునాయాసంగా గటెక్కారు. కానీ క్యాపిటల్లో జరిగిన హింస నేపథ్యంలో ఈసారీ బయటపడతారా? లేదా? అన్నది సర్వత్రా ఉత్కంఠకు దారితీస్తోంది.
వారం రోజుల్లోనే..
సాధారణ పరిస్థితుల్లో.. అభిశంసన ప్రక్రియలో భాగంగా దర్యాప్తు జరుగుతుంది. అధ్యక్షుడికి వ్యతిరేకంగా ఆధారాలు సేకరిస్తారు. ఈ ఆధారాలను జ్యుడిషియరీ కమిటీకి పంపిస్తారు. అక్కడ విచారణ జరిపి.. అనంతరం ఆ ఆర్టికల్ డ్రాఫ్ట్ను ప్రతినిధుల సభకు పంపిస్తారు.
ట్రంప్పై జరిపిన తొలి అభిశంసనలో ఇదే జరిగింది. ఉక్రెయిన్ అధ్యక్షుడితో సంబంధాలపై మూడు నెలల పాటు ఆభిశంసన ప్రక్రియను ఎదుర్కొన్నారు ట్రంప్.
ఇదీ చూడండి- నాపై అభిశంసన తీర్మానం హాస్యాస్పదం: ట్రంప్
కానీ ఇప్పుడు అంత సమయం లేదు. ఫలితంగా ప్రక్రియ అంతా వారం రోజుల్లోనే ముగిసేలా కనపడుతోంది. ఇందుకు కారణం క్యాపిటల్ భవనంలో జరిగిన హింస.
హింసాకాండకు కొద్ది గంటల ముందు.. తన మద్దతుదారులను ట్రంప్ ప్రేరేపించారని డెమొక్రాట్లతో పాటు పలువురు రిపబ్లికన్లూ విశ్వసిస్తున్నారు. ట్రంప్ ప్రసంగానికి సంబంధించిన వీడియోలను అందరూ చూశారు.
ఈ నేపథ్యంలో అభిశంసన ప్రక్రియ ఈసారి నేరుగా ప్రతినిధుల సభకే చేరింది. బుధవారం ఈ వ్యవహారంపై చట్టసభ్యులు ఓటు వేయనున్నారు.
ప్రతినిధుల సభలో అభిశంసన గట్టెక్కితే.. ఈ ఆర్టికల్ను సెనేట్కు పంపిస్తారు. అక్కడ విచారణ జరిపి, అభిశంసనకు ఓటు వేయాలా? వద్దా? అనేది నిర్ణయిస్తారు.
ఇదీ చూడండి:- క్యాపిటల్ హింసాకాండలో పైపు బాంబులు
రిపబ్లికన్ల మద్దతు...
2019లో ట్రంప్పై వేసిన అభిశంసన వీగిపోవడానికి ముఖ్యకారణం రిపబ్లికన్లు. అధ్యక్షుడి వెన్నంటే నిలిచి.. ఆయన్ను కష్టాల నుంచి గట్టెక్కించారు. అయితే ప్రస్తుతం పరిస్థితులు భిన్నంగా ఉన్నాయి. అధ్యక్షుడి ప్రవర్తనతో.. రిపబ్లికన్ పార్టీ రెండుగా చీలిపోయింది. ఈసారి జరిగే అభిశంసనకు పలువురు రిపబ్లికన్ల నుంచి మద్దతు లభిస్తోంది. ట్రంప్కు వ్యతిరేకంగా ఓటు వేస్తామని ఇప్పటికే ఐదుగురుకుపైగా రిపబ్లికన్లు స్పష్టం చేశారు.
సెనేట్కు ఎప్పుడు?
ప్రతినిధుల సభలో అభిశంసన గట్టెక్కిన తర్వాత.. సెనేట్కు పంపించడంపై తుది నిర్ణయం స్పీకర్ పెలోసీదే. అయితే ప్రస్తుత షెడ్యూల్ ప్రకారం.. ఈ నెల 19 వరకు సెనేట్ సమావేశాలు లేవు.
అధ్యక్షుడిగా ఈ నెల 20న జో బైడెన్ ప్రమాణస్వీకారం చేయనున్నారు. అప్పటివరకు పెలోసీ వేచి చూసే అవకాశముందని పలువురు డెమొక్రాట్లు భావిస్తున్నారు. కానీ అంతకు ముందే ఈ వ్యవహారాన్ని ముగించాలని మరికొందరు పెలోసీని అభ్యర్థిస్తున్నారు.
ఇదీ చూడండి:- 'బైడెన్ ప్రమాణస్వీకారం రోజు అమెరికాలో అల్లర్లు!'
సెనేట్లో గట్టెక్కేనా?
ట్రంప్ అభిశంసన సెనేట్లో గట్టెక్కాలంటే.. మూడింట రెండొంతుల మెజారిటీ అవసరం. ప్రస్తుతానికి అభిశంసనకు అంత మెజారిటీ వచ్చే అవకాశం కనిపించడం లేదు. అనేక మంది రిపబ్లికన్లు.. ట్రంప్ రాజీనామా చేయాలని కోరుతున్నారు. ప్రతినిధుల సభలో ప్రవేశపెట్టే ఆర్టికల్ను పరిశీలిస్తామని అంటున్నారు. కానీ సెనేట్ ముందుకు అభిశంసన ప్రక్రియ వస్తే.. ట్రంప్కు వ్యతిరేకంగా ఓటు వేస్తారా? అన్న ప్రశ్నకు సరైన సమాధానం ఇవ్వడం లేదు.
అయితే సెనేట్లో గట్టెక్కకపోయినా... అభిశంసన ప్రక్రియతో ముందుకు వెళ్లాలని డెమొక్రాట్లు దృఢనిశ్చయంతో ఉన్నారు. ఇది యావత్ దేశానికి ఓ సందేశాన్ని ఇస్తుందని విశ్వసిస్తున్నారు. ట్రంప్ను మరోమారు అధ్యక్ష ఎన్నికల్లో పోటీ చేయనివ్వకుండా అడ్డుకుంటుందని భావిస్తున్నారు.
'రాజీనామా చేసే ప్రసక్తే లేదు..'
ఏది ఏమైనా రాజీనామా చేసే యోచనలో ట్రంప్ లేరని సమాచారం. ఈ నెల 19న ఫ్లోరిడాకు వెళ్లి అక్కడే ఉంటారని తెలుస్తోంది. కొన్ని రోజుల పాటు ప్రత్యక్ష రాజకీయాలకు దూరంగా ఉండి.. బైడెన్ పాలనను నిశితంగా పరిశీలిస్తారని ట్రంప్ వర్గాలు చెబుతున్నాయి.
ఇదీ చూడండి:- '25వ సవరణతో నాకేం ముప్పు లేదు.. కానీ'
