రెండు పర్యాయాలు కౌన్సిలర్గా పనిచేశారు. ఇప్పుడు మేయర్గా ఎన్నికయ్యారు. అలాంటి వ్యక్తి ఇంట్లో ఒక్కటంటే ఒక్క లగ్జరీ వస్తువు లేదంటే నమ్మగలరా? కానీ, గుజరాత్ అహ్మాదాబాద్కు చెందిన కిరీట్ పర్మార్ ఇంటిని చూస్తే నమ్మక తప్పదు. అహ్మదాబాద్ మేయర్గా ఇటీవలే ఎన్నికైన ఆయన ఓ మురికివాడలో నివసిస్తూ.. తన నిరాడంబరతతో అందర్నీ ఆశ్చర్యంలో ముంచెత్తుతున్నారు.
అవివాహితుడు..
బాల్యం నుంచే కిరీట్.. రాష్ట్రీయ స్వయం సేవక్ సంఘ్లో సభ్యుడిగా సేవలందిస్తున్నారు. సంఘ్ శాఖను ఆయన నిత్యం సందర్శిస్తూ ఉంటారు. స్థానికులనే తన కుటుంబ సభ్యులుగా భావించే కిరీట్.. పెళ్లి కూడా చేసుకోలేదు.
"ఆర్ఎస్ఎస్లో చేరాక.. సమాజానికి, దేశానికి సేవ చేయాలనే లక్ష్యం నాకు ఏర్పడింది. అందుకే.. నేను ఒంటరిగా ఉండాలనుకున్నాను. ఎన్నో ఏళ్లుగా నేను స్లమ్లోనే ఉంటున్నాను. ఇక్కడ నివసించే వాళ్లే నా కుటుంబ సభ్యులు."
-కిరీట్ పర్మార్.
పార్టీకి ధన్యవాదాలు..
శుక్రవారం ఉదయమే అహ్మదాబాద్ మేయర్గా కిరీట్ బాధ్యతలు స్వీకరించారు. సాధారణ వ్యక్తి అయిన తనను మేయర్గా ఎంపిక చేసినందుకు కిరీట్ సంతోషం వ్యక్తం చేశారు.
"స్లమ్లో నివసించే నాకు ఇంత పెద్ద పదవీ బాధ్యతలు ఇచ్చినందుకు భాజపాకు ధన్యవాదాలు. కేంద్ర ప్రభుత్వం, రాష్ట్ర ప్రభుత్వం చేపట్టిన పథకాలు.. సామాన్యులకు ఎల్లప్పుడూ అండగా నిలుస్తాయి."
-కిరీట్ పర్మార్.
మాజీ మేయర్ కూడా..
కిరీట్ కంటే ముందు అహ్మదాబాద్ మేయర్గా కానాజీ ఠాగూర్ ఉండేవారు. ఆయన కూడా కిరీట్ లానే సాధారణ జీవితం గడిపేవారు. మేయర్గా ఎన్నికైన తర్వాత.. ప్రభుత్వం ఆయనకు ఓ ఇల్లు కేటాయించింది. అయితే.. దాన్ని తిరస్కరించిన కానాజీ.. మధుపురగామ్ ప్రాంతంలో ఒకే గది ఉన్న ఓ ఇంట్లో నివసిస్తున్నారు. ప్రస్తుతం ఆయన అహ్మాదాబాద్ కార్పొరేషన్ పార్లమెంటరీ బోర్డులో సభ్యుడిగా ఉన్నారు.
ఇదీ చూడండి:20ఏళ్లుగా వానరాల ఆలనా పాలనే ఆమె దినచర్య
