అఫ్గానిస్థాన్ సహా పాకిస్థాన్లోని తాజా పరిస్థితులను దృష్టిలో ఉంచుకుని సరిహద్దుల్లో భద్రతను కట్టుదిట్టం చేసింది కేంద్రం. ఈ క్రమంలోనే పంజాబ్ అటారీ సరిహద్దులోని(Attari border) ఇంటిగ్రేడెట్ చెక్ పాయింట్లో.. దేశంలోనే తొలి రేడియేషన్ డిటెక్షన్ ఈక్విప్మెంట్ను ఏర్పాటు చేసింది. అఫ్గాన్ నుంచి వచ్చే ట్రక్కులను ఎక్స్రే ద్వారా తనిఖీ చేపట్టనున్నారు.
"ఆర్డీఈని పూర్తి ట్రక్కు స్కానర్గా పిలుస్తారు. ట్రక్కులు ఆర్డీఈ గుండా వెళ్లిన క్రమంలో అది స్కాన్ చేస్తుంది. ఏవైన వస్తువులు, ఆయుధాలు, మందుగుండు సామగ్రిని అక్రమంగా తరలిస్తే.. ఎక్స్రే కిరణాలు వాటిపై పడగానే ఈ వ్యవస్థ గుర్తిస్తుంది. అలాగే రేడియోఆక్టివ్ వస్తువులను సైతం ఇది కనిపెడుతుంది. అంతర్జాతీయ సరిహద్దుల గుండా రేడియోఆక్టివ్ వస్తువులు, ఇతర పరికరాల అక్రమ రవాణాను అడ్డుకునేందుకు భద్రతా బలగాలకు ఎంతగానే ఉపయోగకరంగా ఉంటుంది."
- ఆదిత్య మిశ్రా, లాండ్ పోర్ట్స్ అథారిటీ ఆఫ్ ఇండియా ఛైర్మన్.
మరో ఏడు..
మరో ఏడు ఆర్డీఈ వ్యవస్థలు ఏర్పాటు చేసేందుకు సన్నాహాలు జరుగుతున్నట్లు చెప్పారు మిశ్రా. అటారీ వాఘా సరిహద్దు, పాట్రోపాల్, దావ్కి, అగర్తలా, సుతర్కాని(బ్లంగా సరిహద్దు), మొరేహ్(మయన్మార్ సరిహ్దదు), రాక్షాల్, జోగ్బానీ(నేపాల్ సరిహద్దు)లో ల్యాండ్ పోర్ట్ అథారిటీ ఏర్పాటు చేస్తుందని తెలిపారు. కొద్ది రోజుల క్రితమే వీటికోసం టెండర్లు పిలిచినట్లు చెప్పారు.
పాకిస్థాన్తో వాణిజ్యం నిలిచిపోయినప్పటికీ, అఫ్గాన్ ట్రక్కులు పాక్ మీదుగా అటారీ సరిహద్దుల గుండా దేశంలోకి వస్తున్నాయి. ప్రతి రోజు సుమారు 30 ట్రక్కుల్లో డ్రైఫ్రూట్స్, ఇతర పండ్లు అటారీ సరిహద్దుల నుంచి సరఫరా అవుతున్నాయి. భూమార్గాల ద్వారా.. నేపాల్, బంగ్లాదేశ్, మయన్మార్, పాకిస్థాన్, అఫ్గానిస్థాన్(పాకిస్థాన్ మీదుగా)లతో వాణిజ్యం కొనసాగిస్తోంది భారత్. చైనాతో ఉపరితల రవాణా వాణిజ్యం లేదు.
ఇదీ చూడండి: అట్టారీ సరిహద్దులో భారీగా అక్రమ ఆయుధాల పట్టివేత
