డిప్యూటీ ఎలక్షన్ కమిషనర్ సుదీప్ జైన్ను వెంటనే ఆ పదవి నుంచి తొలగించాలని తృణమూల్ కాంగ్రెస్ డిమాండ్ చేసింది. ఆయన పక్షపాతంగా వ్యవహరిస్తున్నారని ఆరోపించింది.
"డిప్యూటీ ఎన్నికల కమిషనర్ సుదీప్ జైన్ పక్షపాతంగా వ్యవహరిస్తున్నారు. మళ్లీ భాజపాకు అనుకూలంగా వ్యవహరిస్తున్నారు. ఆయన్ను వెంటనే పదవి నుంచి తొలగించాలి. దీనికి సంబంధించిన లేఖను ఎలక్షన్ కమిషన్కు.. మా పార్టీ అధికార ప్రతినిధి డెరెక్ ఓబ్రెయిన్ అందజేశారు."
-సౌగతా రాయ్, తృణమూల్ కాంగ్రెస్ ఎంపీ
2019లో లోక్సభ ఎన్నికల ప్రచారం సందర్భంగా కోల్కతాలో అమిత్ షా పర్యటించారు. అప్పుడు భాజపా, తృణమూల్ కార్యకర్తల మధ్య ఘర్షణ చెలరేగింది. ఆ సమయంలో ఈశ్వర చంద్ర విద్యాసాగర్ విగ్రహాన్ని ఎవరో ధ్వంసం చేశారు. విగ్రహాన్ని భాజపా కార్యకర్తలే ధ్వంసం చేశారని తృణమూల్ ఆరోపించింది. ఆ వ్యాఖ్యలను భాజపా ఖండించింది. అయితే ఈ ఘటనతో ఆ ప్రాంతంలో ప్రచారం నిర్వహించకుండా ఎన్నికల సంఘం నిషేధం విధించింది. కాగా అప్పడు ఎన్నికల విధులు నిర్వర్తించిన సుదీప్ జైన్ తప్పుడు నివేదిక ఇవ్వడం వల్లే ఆ ప్రాంతంలో ప్రచారం నిర్వహించకుండా ఈసీ నిషేధం విధించిందని సౌగతా రాయ్ ఆరోపించారు. మళ్లీ ఆయన భాజపాకు అనుకూలంగా వ్యవహరిస్తున్నారని అన్నారు. అందుకే జైన్ను విధుల నుంచి తొలగించాలని డిమాండ్ చేస్తున్నట్లు తెలిపారు.
ఎన్నికల నోటిఫికేషన్ వెలువడినప్పటి నుంచి ఈసీ పక్షపాతంగా వ్యవహరిస్తోందని తృణమూల్ పార్టీ ఆరోపిస్తోంది. ఈసీ పక్షపాతంగా వ్యవహరిస్తోందనడానికి రాష్ట్రంలో 8 విడతలుగా ఎన్నికలు నిర్వహించలని నోటిఫికేషన్ ఇవ్వడమే చక్కని ఉదాహరణ అని పేర్కొంది.
ఇదీ చూడండి: టీఎంసీ నుంచి భాజపా గూటికి మరో కీలక నేత
