వాతావరణ మార్పులతో భూతాపం పెరిగిపోవటం వంటి సమస్యలతో పెను ముప్పు వాటిల్లుతోంది. ఇలాంటి సవాళ్లను దీటుగా ఎదుర్కొనేందుకు ఓ చక్కటి పరిష్కార మార్గాన్ని చూపుతూ పొరుగు గ్రామాలకు ఆదర్శంగా నిలుస్తోంది ఓ పల్లెటూరు. ఆ ఊరిని ఓ చిరు అడవిలా తీర్చిదిద్దేందుకు పూనుకుని.. 10వేల మొక్కలను నాటాలని లక్ష్యంగా పెట్టుకున్నారు గ్రామస్థులు. అందులో భాగంగా.. ఇప్పటివరకు 2వేల మొక్కలను నాటి.. ఓ చిన్నపాటి అడవినే సృష్టించారు. జపాన్ సాంకేతికతను ఉపయోగించి 'మినీ ఫారెస్ట్'ను రూపొందించిన ఆ గ్రామంపై ప్రత్యేక కథనం.
ఏటికేడు పెరుగుతున్న ఉష్ణోగ్రతలు, తరిగిపోతున్న నీటి వనరులను చూసి.. తమిళనాడు- కోయంబత్తూర్ జిల్లా అన్నూర్ ప్రాంతంలోని సెమ్మని చెట్టిపాలియం గ్రామం తల్లడిల్లిపోయింది. దానికితోడు ఆ పరిసర ప్రాంతాల్లో గత పదేళ్లుగా ఇనుము, ఉక్కు కర్మాగారాలు పుట్టుగొడుగుల్లా పుట్టుకురావడం గమనించింది. కాలానుగుణంగా వర్షాలు లేకపోవడం, పశువుల పెంపకం నానాటికీ తగ్గిపోవడం వంటివి అక్కడి ప్రజల్ని తీవ్రంగా కలిచివేశాయి. భూతాపంతో.. భూగర్భ జలాలు అడుగంటిపోయాయి.
ఇదీ చదవండి: 'దేశంలో 80% పల్లెలు వైద్యానికి దూరం'
జపాన్ సాంకేతికతను సాయంతో..
జరుగుతున్న పరిణామాలను పసిగట్టిన స్థానికులు.. ఈ పరిస్థితులు ఇలాగే కొనసాగితే భవిష్యత్తు తరాలు మనుగడ సాగించడం కష్టమనుకున్నారు. దీన్ని అధిగమించి ఆ ఊరిని మళ్లీ పచ్చదనంతో ముంచెత్తాలనుకున్నారు. అనుకున్నదే తడువుగా.. ఓ లక్ష్యాన్ని నిర్దేశించుకుని, దాన్ని సాధించే దిశగా ముందడుగేశారు. జపనీయులు వాడే సాంకేతిక పరిజ్ఞానమైన మియావాకీ(జపాన్ వృక్ష శాస్త్రజ్ఞుడి పేరు) పద్ధతిని అవలంబించారు. అలా.. ఇప్పటివరకు 2వేల మొక్కల్ని నాటి, ఆ గ్రామాన్ని ఓ సుందరమైన అడవిలా తీర్చిదిద్దటంలో తొలి విజయం సాధిచారు. సీతాఫలం, సిమర్రౌబా గ్లాకా, పూవరాసన్(పోర్షియా), నిమ్మ వంటి పలురకాల మొక్కలు నాటామని స్థానికులు తెలిపారు.
ఇదీ చదవండి: 'బాహుబలి' స్ఫూర్తితో విల్లు, బాణాల తయారీ
'మా గ్రామం ఓ నమూనాగా..'
"మా గ్రామాన్ని ఇతరులకు ఓ నమూనాగా మార్చాలని మేము ప్రణాళికలు రచించుకున్నాం. దాన్ని ఊరి ప్రజలందరి మద్దతుతో అమలు చేస్తున్నాం. తొలిదశలో రెండువేల మొక్కలను నాటాం. మేము చేపట్టిన ఈ పచ్చదనం కృషితో.. వర్షాలు, భూగర్భజలాలు మళ్లీ పెరుగుతాయని ఆశిస్తున్నాం. ఈ కార్యక్రమం మా ఊరి యువతకు మంచి ప్రేరణగా నిలుస్తోంది."
-పాకియరాజ్, స్థానిక ఉపాధ్యాయుడు
మహాత్మా గాంధీ జాతీయ గ్రామీణ ఉపాధి హామీ పథకం ద్వారా.. పట్టణ పంచాయతీ సహకారంతో ఆ మొక్కలకు కంచెలు వేయాలనుకున్నామని పాకియరాజ్ చెప్పుకొచ్చారు.
ఇదీ చదవండి:జీవజాతులకు పెను ముప్పు!
'చూస్తూ ఉండలేకపోయాం..'
"మా ఊళ్లో భూగర్భజలాలు 100 అడుగుల లోతుకు క్షీణించాయి. ఎంతో సారవంతమైన భూమి అంతా బంజర భూమిగా మారింది. ఒకప్పుడు వరి, ఇతర తృణధాన్యాలను సాగు చేసిన భూములిప్పుడు నివాస స్థలాలుగా మారాయి. ఈ పరిస్థితుల్ని అధిగమించి.. గ్రామంలో మళ్లీ పచ్చటి వాతావరణం నెలకొల్పాలనుకున్నాం. అందుకోసం ప్రజల సహకారంతో ఓ చిన్న అడవిని సృష్టించాలనుకున్నాం."
-రఘురమణ, స్థానికుడు
అలా తమ ప్రతిపాదనతో గ్రామస్థులంతా ఏకమై.. ఒక్కో వ్యక్తి ఒక మొక్కతో పాటు, ప్రతి ఇంటి నుంచి ఓ నీటి కుండ తేవాలని నిర్ణయించుకున్నామని రఘురమణ చెప్పారు. ఈ కార్యక్రమానికి ఊరి ప్రజల నుంచి మంచి ఆదరణ లభిస్తోందని ఆయన అన్నారు.
ఇదీ చదవండి: మతి పోగొట్టే మానవత్వం!
పొరుగు గ్రామాలకు ఆదర్శంగా..
సెమ్మని చెట్టిపాలియం గ్రామస్థులు అవలంబించిన ఈ పథకం విజయవంతం కావడం వల్ల.. ఆ అటవి పునరుద్ధరణ నమూనాను అనుకరించేందుకు పొరుగు గ్రామాల యువకులు ఎంతో ఆసక్తి చూపుతున్నారు. స్థానికుల ప్రయత్నాలతో ఆ గ్రామం త్వరలోనే ఓ పచ్చని అడవిలా, పక్షుల అభయారణ్యంగా మారుతుందనే అభిప్రాయం వ్యక్తమవుతోంది. అలా.. ఊరు కోల్పోయిన పూర్వవైభవాన్ని మళ్లీ ఈ 'మినీ-ఫారెస్ట్' ద్వారా తిరిగి దక్కుతుందని గ్రామస్థులు ఆశిస్తున్నారు.
ఇదీ చదవండి: బాలుడి అద్భుత బ్యాటింగ్కు ఐపీఎల్ ఫ్రాంఛైజీ ఫిదా
