తృణమూల్ కాంగ్రెస్ ప్రకటించిన అభ్యర్థుల జాబితాపై ఆ పార్టీ సీనియర్ నేతలు అసంతృప్తి వ్యక్తం చేస్తున్నారు. టికెట్ దక్కలేదని ఓ ఎమ్మెల్యే రాజీనామా చేయగా మరొకరు భాజపాలో చేరేందుకు సిద్ధమయ్యారు. తృణమూల్ కీలక నేత, సత్గాచియా ఎమ్మెల్యే సోనాల్ గుహా.. భాజపాలో అడుగుపెట్టనున్నట్టు సూచనలు చేశారు. బంగాల్ భాజపా ఉపాధ్యక్షుడు ముకుల్ రాయ్ను సంప్రదించి తన రాజకీయ భవిష్యత్తుపై నిర్ణయం తీసుకుంటానని సోనాల్ గుహా శనివారం ప్రకటించారు.
"మమతా దీదీకి మంచి ఆలోచనలు ఇవ్వాలని భగవంతుడిని ప్రార్ధిస్తున్నాను. పార్టీ మొదలు నుంచి నేను ఆమెతో ఉన్నాను. ఓ రాజకీయ నేతను అయ్యి ఉండి పదవి లేకుండా ఉండలేను. నా భవిష్యత్తు గురించి ఆలోచించుకోవాలి. నేను ఓ గౌరవీయ స్థానంలో కొనసాగాలని కోరుకుంటున్నాను."
- సోనాల్ గుహా, తృణమూల్ సీనియర్ నేత
షిబ్పూర్ ఎమ్మెల్యే రాజీనామా..
ఎమ్మెల్యే అభ్యర్థిగా జాబితాలో తన పేరు చేర్చకపోవడంపై తృణమూల్ సీనియర్ నేత, షిబ్పూర్ ఎమ్మెల్యే జటు లాహిరి అసహనం వ్యక్తం చేశారు. పార్టీ వైఖరిని తప్పుపట్టారు. ఈ సందర్భంగా శనివారం ఆయన పార్టీకి రాజీనామా చేశారు.
"నేను పార్టీకి విధేయుడిగా ఉంటున్నా.. మమతా బెనర్జీ నన్ను పక్కన పెట్టారు. నాకు నామినేషన్ దక్కలేదన్న బాధ కంటే ఎవరో ఓ బయట వ్యక్తికి అవకాశం ఇవ్వడమే బాధ కలిగిస్తోంది. అతను పార్టీలో చేరి ఎక్కువ కాలం కూడా కాలేదు. తృణమూల్కు మా సేవలు అవసరం లేదని తెలుస్తోంది. కాబట్టీ నేను ఈ పార్టీని వీడుతున్నాను."
-జటు లాహిరీ, మాజీ తృణమూల్ నేత
భాజపాలో చేరే అవకాశం ఉందని లాహిరీ సూచనలు అందించారు. అయితే ఈ విషయాన్ని భాజపా ఖండించింది. లాహిరీ పార్టీలో చేరడంపై తమ వద్ద ఎలాంటి సమాచారం లేదని స్పష్టం చేసింది. జటు లాహిరీ స్థానంలో తృణమూల్ మాజీ క్రికెటర్ మనోజ్ తివారీకి అవకాశం ఇచ్చింది.
ఇదీ చదవండి : భాజపాలో చేరిన టీఎంసీ మాజీ ఎంపీ దినేశ్ త్రివేది
