ఉత్తరాఖండ్ ముఖ్యమంత్రిగా తీరథ్ సింగ్ రావత్ ప్రమాణ స్వీకారం చేశారు. రాజ్భవన్లో జరిగిన కార్యక్రమంలో ఆయన చేత ప్రమాణం చేయించారు గవర్నర్ బేబి రాణి మౌర్య.
ఉత్తరాఖండ్లో అసమ్మతి నేపథ్యంలో సీఎం పీఠాన్ని త్రివేంద్ర సింగ్ రావత్ వీడారు. ఆయన స్థానంలో తీరథ్ సింగ్ను ఎంపిక చేసింది భాజపా అధిష్ఠానం. దేహ్రాదూన్లోని పార్టీ కార్యాలయంలో ఎమ్మెల్యేలు సమావేశమై భాజపా శాసనసభాపక్ష నేతగా తీరథ్ను ఎన్నుకున్నారు.
తీరథ్ సింగ్ రావత్ ప్రస్తుతం గడ్వాల్ ఎంపీగా ఉన్నారు. 2013-15 వరకు భాజపా రాష్ట్ర అధ్యక్షుడిగా సేవలందించారు. ప్రస్తుతం పార్టీ జాతీయ కార్యదర్శిగా ఉన్నారు. 2012-17 వరకు చౌబట్టఖల్ నియోజకవర్గం నుంచి ఎమ్మెల్యేగా సేవలందించారు.
మోదీ శుభాకాంక్షలు..
ఉత్తరాఖండ్ ముఖ్యమంత్రిగా ప్రమాణ స్వీకారం చేసిన తీరథ్ సింగ్ రావత్కు శుభాకాంక్షలు తెలిపారు ప్రధానమంత్రి నరేంద్ర మోదీ. అపారమైన పరిపాలన, సంస్థాగత అనుభవాన్ని ఆయనతో పాటు తీసుకొచ్చారని కొనియాడారు. రావత్ నాయకత్వంలో రాష్ట్ర పురోగతి సరికొత్త శిఖరాలకు చేరుతుందని తెలిపారు.
భాజపా నేతలు..
తీరథ్ సింగ్ రావత్కు పలువురు భాజపా నేతలు శుభాకాంక్షలు తెలిపారు. ప్రధాని మోదీ సూచనలతో అభివృద్ధికి సరికొత్త దిశలను చూపుతారనే నమ్మకం ఉందన్నారు భాజపా జాతీయ అధ్యక్షుడు జేపీ నడ్డా. కేంద్ర పథకాలను ప్రతి ఒక్కరికీ చేరేలా చూస్తారని తెలిపారు. తీరథ్ నాయకత్వంలో రాష్ట్ర అభివృద్ధి ప్రయత్నాలు కొత్త శక్తితో దూసుకెళ్తాయన్నారు కేంద్ర హోంమంత్రి అమిత్ షా. ప్రజా జీవితంపై రావత్కు అపారమైన అనుభవం ఉందన్నారు రక్షణ మంత్రి రాజ్నాథ్. రాష్ట్రంలో అభివృద్ధి, సుపరిపాలనలో ముందుకు సాగుతుందన్నారు.
ఇదీ చూడండి: రాజకీయ అస్థిత్వానికి చిరునామాగా ఉత్తరాఖండ్!
