ఝార్ఖండ్లో తీవ్ర విషాదం జరిగింది. రామ్గఢ్ జిల్లాలో మంగన్పుర్లో ఒకే కుటుంబానికి చెందిన ముగ్గురు చిన్నారులు చెరువులో పడి మృతి చెందారు. దాంతో ఆ గ్రామంలో విషాద ఛాయలు అలుముకున్నాయి.
గ్రామంలోని చెరువు పక్కన ఆడుకోవడానికి ముగ్గురు చిన్నారులు వెళ్లారు. అందులో ఒక చిన్నారి చేతులు కడుక్కుందామని చెరువు దగ్గరికి వెళ్లాడు. ప్రమాదవశాత్తు చెరువులో పడిపోయాడు. ఎంతకీ ఆ బాలుడు రాకపోవడం వల్ల మరో చిన్నారి అతన్ని వెతుకుతూ వెళ్లగా చెరువులో కనిపించాడు. కాపాడదామని ఈ బాలుడు చెరువులోకి దూకాడు. దాంతో ఇద్దరూ చెరువులో మునిగిపోయారు.
వీరిద్దరూ ఇంకా రావటంలేదని మూడో బాలుడు వారిని వెతుకుతూ వెళ్లగా వారు చెరువులో మునిగిపోతూ కనిపించారు. వారిని కాపాడదామని ఈ బాలుడు చెరువులో దూకాడు. దాంతో చెరువులో ముగ్గురు మునిగి చనిపోయారు. సమాచారం తెలుసుకున్న కుటుంబ సభ్యులు, చెరువు దగ్గరికి వచ్చి చిన్నారులను బయటికి తీయగా అప్పటికే వారు చనిపోయారు. దాంతో ఆ కుటుంబ సభ్యుల రోదన మిన్నంటింది.
రామ్గఢ్ ఎమ్మెల్యే మమ్మత దేవి వచ్చి కుటుంబ సభ్యులకు సానుభూతి తెలిపారు. చిన్నారులు ఒకరినొకరు కాపాడబోయి చెరువులో పడి చనిపోయారని డీఎస్పీ సంజీవ్ కుమార్ మిశ్రా తెలిపారు.
ఇదీ చూడండి: ట్రాక్పై పల్టీలు కొట్టి.. రేసులో దూసుకెళ్లిన కారు
