భారతీయ జనతా పార్టీని, వాస్తవాలను ఎదుర్కొనేందుకు భయపడేవారు స్వేచ్ఛగా పార్టీని విడిచి వెళ్లొచ్చని స్పష్టం చేశారు కాంగ్రెస్ అగ్రనేత రాహుల్ గాంధీ. దేనికీ భయపడకుండా పని చేసేవారు పార్టీలోకి రావాలని పిలుపునిచ్చారు. ఇటీవలి కాలంలో కీలక నేతలు పార్టీని వీడుతున్న నేపథ్యంలో రాహుల్ వ్యాఖ్యలు ప్రాధాన్యం సంతరించుకున్నాయి.
పార్టీ సామాజిక మాధ్యమాల కార్యకర్తలతో వర్చువల్గా సమావేశమైన సందర్భంగా ఈ వ్యాఖ్యలు చేశారు రాహుల్. ఈ కార్యక్రమంలో సుమారు 3,500 మంది కార్యకర్తలు పాల్గొన్నట్లు సమాచారం.
" భయమనేదే లేనివారు చాలా మంది ఉన్నారు. కానీ వారు కాంగ్రెస్కు వెలుపల ఉన్నారు. వారంతా మనవారు. వారిని పార్టీలోకి తీసుకురండి. పార్టీలో భయంతో బతుకుతున్న వారు వెంటనే వెళ్లిపోండి. వారు ఆర్ఎస్ఎస్కు చెందిన వారు. వాళ్లు వెళ్లిపోవాల్సిందే. వారిని స్వేచ్ఛగా వదిలేద్దాం. మనకు వాళ్లు అవసరం లేదు. భయం లేకుండా పని చేసేవారే కావాలి. అదే మన సిద్ధాంతం. ఇదే నేను మీకు ఇచ్చే సందేశం. "
- రాహుల్ గాంధీ, కాంగ్రెస్ నేత
జోతిరాదిత్య సింధియాను ఉదాహరణగా చూపిస్తూ కార్యకర్తలతో రాహుల్ మాట్లాడినట్లు పార్టీ వర్గాలు తెలిపాయి. తన ఇంటిని రక్షించుకునేందుకు భయంతో ఆర్ఎస్ఎస్లో చేరారని పేర్కొన్నట్లు చెప్పాయి. కార్యకర్తల్లోని వివిధ వర్గాలకు చెందిన 10 మంది యువతతో గాంధీ వ్యక్తిగతంగా మాట్లాడారని, ఎప్పుడూ వారికి అందుబాటులో ఉంటానని హామీ ఇచ్చినట్లు కాంగ్రెస్ వర్గాలు తెలిపాయి.
ఇటీవల చాలా మంది సీనియర్ నేతలు పార్టీని వీడి భాజపాలో చేరారు. అందులో సింధియా, జితిన్ ప్రసాద వంటి కీలక నేతలు ఉన్నారు. మహారాష్ట్ర కాంగ్రెస్ నేతలు నారాయణ రాణే, రాధాక్రిష్ణ విఖే పాటిల్లు 2019లో పార్టీని వీడారు.
ఇదీ చూడండి: 'పిచ్చోడి చేతిలో రాయిలా దేశద్రోహ చట్టం!'
