బంగాల్లో భాజపా 200కుపైగా సీట్లు దక్కించుకుంటుందని జోస్యం చెప్పారు ప్రధాని నరేంద్ర మోదీ. దక్షిణ 24 పరగణాల జిల్లా జయనగర్లో ఎన్నికల ప్రచారం నిర్వహించిన ఆయన.. ఎక్కడైనా భాజపానే ఉందని అన్నారు. ఈ సందర్భంగా.. మమత సర్కార్పై విమర్శలు గుప్పించారు. ఎన్నికల్లో ఓడిపోతాననే భయంతోనే.. ఆమె ఇతర పార్టీ నేతల మద్దతు, సాయం కోరుతున్నారని అన్నారు.
''కొన్నివారాల క్రితం భాజపా 200 కంటే ఎక్కువ స్థానాల్లో గెలుస్తుందని బంగాల్ ప్రజలు చెప్పారు. భాజపా బలంగా తయారైంది. తొలిదశలో ఓటింగ్ను చూస్తేనే ఇది స్పష్టమైంది. బంగాల్లో భాజపా 200 కంటే ఎక్కువే గెలుస్తుంది.''
- నరేంద్ర మోదీ, ప్రధాని
రెండో దశలోనూ ప్రజలు పెద్ద సంఖ్యలో ఓటు హక్కు వినియోగించుకునేందుకు తరలివెళ్లారని.. బంగాల్లో భాజపా గాలి వీస్తోందని ఉద్ఘాటించారు మోదీ. తృణమూల్ కాంగ్రెస్కు కాషాయంతో, తిలకంతో సమస్య ఉందని అన్నారు మోదీ.
''జైశ్రీరాం నినాదంతో మమతా దీదీకి సమస్య ఉంది. బంగాల్ మొత్తానికి ఈ సంగతి తెలుసు. దుర్గామాత నిమజ్జనంపైనా ఇబ్బంది ఉంది. ఇది కూడా అందరికీ తెలుసు. దీదీకి ఇప్పుడు తిలకం, కాషాయ వస్త్రంతోనూ సమస్య వచ్చినట్లుంది. పిలక ఉన్నవారిని దీదీ అనుచరులు రాక్షసులుగా పిలుస్తున్నారు.''
- నరేంద్ర మోదీ, ప్రధాని
ఇదీ చదవండి: ఫిర్యాదుల్ని పట్టించుకోరేం.. కోర్టుకెళ్తాం: మమత
