Terrorist arrested in JK: జమ్ముకశ్మీర్ దోడలో ఆదివారం ఓ ఉగ్రవాదిని పోలీసులు పట్టుకున్నారు. అతడి వద్ద నుంచి ఓ చైనీస్ తుపాకీ సహా రెండు మ్యాగజైన్స్, 14 బుల్లెట్లు, మొబైల్ ఫోన్ స్వాధీనం చేసుకున్నట్లు తెలిపారు. అమర్నాథ్ యాత్ర నేపథ్యంలో పోలీసులు భద్రతను కట్టుదిట్టం చేశారు. ఈ క్రమంలోనే దోడ పట్టణంలో ఆదివారం రాత్రి తనిఖీ చేస్తుండగా ఆయుధాలతో సహా ఉగ్రవాది పట్టపడ్డాడు.
ఉగ్రవాదిని దోడలోని కోట గ్రామానికి చెందిన ఫరీద్ అహ్మద్గా గుర్తించారు. ఇతడు చాలా ప్రమాదకర వ్యక్తని.. ఉగ్రవాద కమాండర్ల నుంచి కాల్స్ వచ్చినట్లు ప్రాథమిక దర్యాప్తులో తేలినట్లు పోలీసులు చెప్పారు. మార్చిలో ఇతడి వద్దకు ఆయుధాలు వచ్చాయని.. వాటితో దోడ పోలీసులపై దాడి చేయాలని ఉగ్రవాదులు ఆదేశించినట్లు పేర్కొన్నారు. సకాలంలో స్పందించడం వల్ల ఈ కుట్ర విఫలమైందని పేర్కొన్నారు. పలు సెక్షన్ల కింద కేసు నమోదు చేసిన పోలీసులు.. విచారణ చేపట్టారు.
అక్రమ చొరబాటుదారుడి హతం: భారత సరిహద్దులోకి అక్రమంగా ప్రవేశించిన చొరబాటుదారుణ్ని భద్రతా బలగాలు మట్టుపెట్టాయి. జమ్మూ జిల్లాలోని అంతర్జాతీయ సరిహద్దు వద్ద హతం చేసినట్లు అధికారిక వర్గాలు వెల్లడించాయి. బక్రాపుర్ బార్డర్ ఔట్పోస్ట్ వద్ద ఉదయం 4గంటలకు ఓ వ్యక్తి భారత్లోకి చొరబడేందుకు ప్రయత్నించగా భద్రత బలగాలు గుర్తించి కాల్పులు జరిపాయి. ఈ దాడిలో చొరబాటుదారుడు అక్కడిక్కడే మరణించాడు అని తెలిపాయి.
ఇదీ చదవండి: అగ్నిపథ్ నిరసనలు.. మరోవైపు దరఖాస్తుల వెల్లువ.. వాయుసేనకు 3 రోజుల్లోనే!
