Deaf and Dumb Hotel: మహారాష్ట్ర పుణెలో ఉన్న టెర్రాసిన్ హోటల్లోకి అడుగుపెట్టగానే అక్కడి సిబ్బంది చిరునవ్వుతో స్వాగతం పలుకుతారు. సైగలతోనే ఒకరికొకరు సంభాషించుకుంటారు. ఎందుకంటే వీరంతా బధిర యువతీయువకులు. ఆ హోటల్ ప్రత్యేకత కూడా అదే. ఒకరు, ఇద్దరు కాదు ఆ హోటల్ సిబ్బంది మొత్తం వినికిడి-మూగ సమస్యతో బాధపడుతున్న వారే. కానీ విజయవంతంగా ఆ హోటల్ను నిర్వహిస్తున్నారు. ఇదే అందరి దృష్టిని ఆకర్షించేలా చేస్తోంది.
బధిర యువతీయువకుల్లో ఆత్మవిశ్వాసం పెంచి, వారిని ప్రోత్సహించాలనే లక్ష్యంతో టెర్రాసిన్ పేరుతో హోటల్ను స్థాపించారు సోనమ్ కపాసే. ఒకరికొకరు సంభాషించుకునేందుకు సిబ్బందికి సంజ్ఞల భాషను నేర్పించారు. ఇదంతా బానే ఉంది. కానీ ఎలాంటి సంజ్ఞల భాష రాని ఓ కస్టమర్ వీరితో సంభాషించాలంటే ఎలా? దానికి కూడా ఓ పరిష్కారం కనిపెట్టారు సోనమ్. కస్టమర్ల కోసం ఓ ప్రత్యేక మెనూ కార్డును తయారు చేశారు. అందులో సంబంధిత వంటకం పేరు పక్కన సైన్ లాంగ్వేజ్లో గుర్తులను జోడించారు. దీని ద్వారా కస్టమర్లకు సిబ్బందితో సంభాషించడం సులువు అవుతోంది.
ఎఫ్సీ రోడ్డులో ఉన్న టెర్రాసిన్ హోటల్కు.. ప్రారంభించిన కొద్ది రోజులకే మంచి ఆదరణ లభిస్తోంది. ఎలాంటి తడబాటు లేకుండా పనిచేస్తున్న ఇక్కడి సిబ్బందిని చూసి కస్టమర్లు ఆశ్చర్యపోతున్నారు.
ఇదీ చూడండి : కుమార్తెను కొట్టారని స్కూల్ డైరెక్టర్పై జవాన్ కాల్పులు
