ఛత్తీస్గఢ్.. రాయ్పుర్లోని ఆగ్నేయ మధ్య రైల్వేలో అరుదైన కారుణ్య నియామకం జరిగింది. 10 నెలల రాధిక అనే బాలికకు కారుణ్య నియామకం కింద ఉద్యోగ రిజిస్ట్రేషన్ను బుధవారం పూర్తి చేశారు రైల్వే అధికారులు. బాలికకు 18 ఏళ్లు నిండాక.. రైల్వే శాఖ ఆ ఉద్యోగాన్ని ఇవ్వనుంది. ఆగ్నేయ మధ్య రైల్వే చరిత్రలో ఇంత చిన్న వయసు వారికి కారుణ్య నియామకం ఇవ్వడం ఇదే ప్రథమమని అధికారులు తెలిపారు.
అసలేం జరిగిందంటే: రాధిక తండ్రి రాజేంద్ర కుమార్ యాదవ్.. భిలాయ్‌లోని పీపీ యార్డ్‌లో అసిస్టెంట్‌గా పనిచేస్తున్నారు. రాజేంద్ర.. ఛరోడాలోని రైల్వే క్వార్టర్స్లో నివాసం ఉండేవాడు. జూన్ 1న రాజేంద్ర, అతని కుటుంబంతో కలిసి భిలాయ్ వెళ్తుండగా రోడ్డు ప్రమాదం జరిగింది. ఈ ప్రమాదంలో రాజేంద్ర, అతని భార్య మంజు యాదవ్ అక్కడికక్కడే ప్రాణాలు కోల్పోయారు. వీరి పాప ఈ ప్రమాదం నుంచి క్షేమంగా బయటపడింది. అప్పటి నుంచి రాధిక.. అమ్మమ్మ గారి ఇంట్లోనే ఉంటుంది.
కారుణ్య నియామక ప్రక్రియ కోసం రైల్వే కార్యాలయానికి రాధికను ఆమె తాత, మామ బుధవారం తీసుకెళ్లారు. అనంతరం వేలిముద్రలను తీసుకుని రాధిక ఉద్యోగ రిజిస్ట్రేషన్ను పూర్తి చేశారు రైల్వే అధికారులు. రాధికకు 18 ఏళ్లు నిండిన తర్వాత ఉద్యోగంతో పాటు రైల్వే ఉద్యోగులకు వర్తించే అన్ని సౌకర్యాలు పొందవచ్చని అధికారులు తెలిపారు.
ఇవీ చదవండి:
