విద్యార్థిని ఉపాధ్యాయుడే కిడ్నాప్ చేసి హత్య చేసిన ఘటన ఉత్తప్ప్రదేశ్ దేవరియాలో జరిగింది. ఈ దారుణానికి పాల్పడిన ముగ్గురిని పోలీసులు అదుపులోకి తీసుకున్నారు. రూ.5 లక్షలు మృతుడి తండ్రి నుంచి నిందితులు డిమాండ్ చేశారు. బాధితుని తండ్రి పోలీసులకు ఫిర్యాదు చేయడం వల్ల ఆగ్రహించిన నిందితులు బాలుడ్ని హత్యచేసి టాయిలెట్లో పడేశారు.
అసలేం జరిగిందంటే: లార్ పోలీస్ స్టేషన్ పరిధిలోని హర్ఖోలి గ్రామానికి చెందిన బాలుడు సంస్కార్ యాదవ్ (6).. ప్రతి రోజు ఉదయం కోచింగ్ సెంటర్కు వెళ్లేవాడు. బుధవారం కూడా అలా వెళ్లిన సంస్కార్ ఇంటికి తిరిగిరాలేదు. దీంతో అతని తండ్రి, కుటుంబ సభ్యులు వెతికారు. ఎక్కడా కనిపించక పోవడం వల్ల కోచింగ్ సెంటర్కు వెళ్లి ఆరా తీశారు. ఆ రోజు కోచింగ్ సెంటర్ రాలేదని వారికి తెలిసింది.
సాయంత్రం సమయంలో బాధితుడి కుటుంబ సభ్యులకు ఓ లేఖ అందింది. రూ.5 లక్షలు సిద్ధం చేసుకోవాలని.. లేదంటే మీ బిడ్డను హత్య చేస్తామని ఆ లేఖలో ఉంది. వెంటనే మృతుడి తండ్రి గోరఖ్ యాదవ్ పోలీసులకు సమాచారం అందించాడు. పోలీసు బుధవారం రాత్రంతా నిందితుల కోసం వెతికారు. గురువారం ఉదయం కోచింగ్ టీచర్ ఇంట్లోని టాయిలెట్లో శవమై కనిపించాడు సంస్కార్ యాదవ్. కోచింగ్ టీచర్ మనువడికి ఈ హత్యలో ప్రమేయం ఉన్నట్లు పోలీసులు తెలిపారు. మృతదేహాన్ని పోస్టుమార్టం నిమిత్తం ఆసుపత్రికి పంపారు పోలీసులు. నిందితులపై కఠిన చర్యలు తీసుకుంటామని తెలిపారు.
ఇవీ చదవండి: పది నెలల బాలికకు రైల్వే ఉద్యోగం.. అదెలాగంటే?
