కరోనా మహమ్మారి కారణంగా 60 రోజులుగా మూతపడిన ప్రపంచ ప్రఖ్యాత కట్టడం.. తాజ్మహల్ తిరిగి తెరుచుకుంది. మళ్లీ సందర్శకుల సందడి మొదలైంది. కరోనా వైరస్ తగ్గుముఖం పడుతున్న క్రమంలో పురావస్తు శాఖ పరిధిలోని అన్ని స్మారక కట్టడాలు, స్థలాలు, ప్రదర్శనశాలల్ని బుధవారం తెరిచారు.
ఒకసారి 650 మందికి మాత్రమే తాజ్మహల్ పరిసరాల్లోకి అనుమతి ఉంటుందని అధికారులు తెలిపారు. అయితే ఇతర కట్టడాల విషయంలో ఇలాంటి నిబంధనలు లేవని వెల్లడించారు.
తెల్లవారు జామునే...
తాజ్మహల్ వద్ద కొవిడ్ నిబంధనలు పాటించేలా థర్మల్ స్క్రీనింగ్, శానిటైజేషన్ వంటి అన్ని చర్యలు చేపట్టారు. బుధవారం తెల్లవారుజామునే బ్రెజిల్కు చెందిన మెలిస్సా డలరోజా, ఘజియాబాద్కు చెందిన ఓ కుటుంబం ప్రేమ సౌధాన్ని చూసేందుకు వచ్చారు. తాజ్మహల్ను చూడాలని ముందుగానే ప్రణాళిక వేసుకున్నా.. లాక్డౌన్తో మూతపడటం వల్ల వాయిదా వేసుకోవాల్సి వచ్చిందని ఓ కుటుంబం తెలిపింది. లాక్డౌన్ తర్వాత తొలిరోజునే సందర్శించటం చాలా సంతోషంగా ఉన్నట్లు పేర్కొంది.
ఆన్లైన్ ద్వారానే..
కేవలం ఆన్లైన్ ద్వారానే టికెట్లు బుక్ చేసుకోవాల్సి ఉంటుంది. సందర్శకులు కొవిడ్ నిబంధనలు తప్పనిసరిగా పాటించాలని, ఎక్కడా కట్టడాలను తాకరాదని పురావస్తు శాఖ అధికారులు తెలిపారు. బుకింగ్లన్నీ ఆయా రాష్ట్రాలు, విపత్తు నిర్వహణ యంత్రాగాలు జారీ చేసే ఉత్తర్వులకు లోబడి ఉంటాయని స్పష్టం చేశారు.
60 రోజులుగా..
కొవిడ్ రెండో దశ ఉద్ధృతి కారణంగా ఏప్రిల్ 16న తాజ్మహల్ సహా దేశవ్యాప్తంగా ఉన్న ప్రముఖ కట్టడాలు, సందర్శనాశాలల్ని మూసివేశారు. కరోనా తగ్గుతున్నందున 60 రోజుల తర్వాత తెరుచుకున్నాయి.
ఇదీ చూడండి: పెళ్లామే కావాలన్న పదహారేళ్ల బాలుడు
