Moonsoon In Hyderabad : నైరుతి రుతుపవనాల ప్రభావంతో హైదరాబాద్లో పలు ప్రాంతాల్లో వర్షం పడుతోంది. నాంపల్లి, బషీర్‌బాగ్‌, ఖైరతాబాద్‌, లక్డీకాపుల్‌, హిమాయత్‌నగర్‌, జీడిమెట్ల, కొంపల్లి, సురారం, షాపూర్‌నగర్, కుత్బుల్లాపూర్‌, చింతల్‌, జగద్గిరిగుట్ట, ముషీరాబాద్‌, ఆర్టీసీ క్రాస్‌ రోడ్, చిక్కడపల్లి, బాగ్‌ లింగంపల్లి, అశోక్‌ నగర్‌, లోయర్‌ ట్యాంక్‌బండ్‌, సరూర్‌ నగర్‌, కొత్తపేట్‌, దిల్‌సుఖ్‌నగర్‌, చైతన్యపురి, ఎల్బీనగర్‌, నాగోల్‌, వనస్థలిపురం, బంజారాహిల్స్‌, జూబ్లీహిల్స్‌, మాదాపూర్‌, పంజాగుట్ట, దుండిగల్‌, బహదూర్‌పల్లి, కోఠి, అబిడ్స్‌, బేగంబజార్‌, తదితర ప్రాంతాల్లో వర్షం పడుతోంది. పలుచోట్ల రహదారులపై నీరు నిలిచిపోవడంతో వాహనదారులు ఇబ్బందులు ఎదుర్కొంటున్నారు. భారీ వర్షాలు వల్ల రోడ్లపై నీరు నిలిచింది. ట్రాఫిక్‌కు అంతరాయం ఏర్పడింది. రేపు కూడా భారీ వర్షాలు కురిసే అవకాశం వాతావరణశాఖ తెలిపింది. లోతట్టు ప్రాంత ప్రజలు అప్రమత్తంగా ఉండాలని జీహెచ్‌ఎంసీ సూచించింది.
ఈ జిల్లాలో భారీ వర్షాలు.. కొమురం భీం, మంచిర్యాల,కరీంనగర్, పెద్దపల్లి, జయశంకర్ భూపాలపల్లి, వరంగల్‌, హన్మకొండ జిల్లాల్లో భారీ వర్షాలు కురిసే అవకాశం ఉందని ప్రకటించింది. రాగల మూడు రోజులు రాష్ట్రంలో ఉరుముల మెరుపులతో కూడిన వర్షాలు అక్కడక్కడ వచ్చే అవకాశం ఉందని వాతావరణ కేంద్రం సంచాలకులు విడుదల చేసిన ప్రకటనలో పేర్కొన్నారు. ఈ రోజు ఆవర్తనము వాయువ్య బంగాళాఖాతం దాని పరిసరాలలోని ఒడిస్సా- పశ్చిమ బెంగాల్‌ తీరాలకు దగ్గరలో సగటు సముద్రమట్టానికి 7.6కిలో మీటర్ల వరకు స్థిరంగా కొనసాగుతూ ఎత్తుకు వెళ్లే కొలది నైరుతి దిశ వైపుకు వంపు తిరిగి స్థిరంగా కొనసాగుతుందని వివరించారు.
ఈసారీ ఎల్నినో ప్రభావం.. రాష్ట్రవ్యాప్తంగా వర్షాలు కురవడం ప్రారంభం కావడంతో రైతన్నలు సాగుకు సమయత్తమవుతున్నారు. కానీ ఈ సంవత్సరం రుతుపవనాలు ఆలస్యం కావడంతో సాగు నెమ్మదించింది. గతేడాది కంటే ఈ సంవత్సరం వర్షాలు తక్కువగా ఉంటాయని శాస్త్రవేత్తలు అంచనా వేస్తున్నారు . రుతుపవనాల ఆలస్యంతో దేశంలోని కొన్ని ప్రాంతాల్లో ఈ సంవత్సరం వానాకాలంలో వర్షపాతం అయిదు శాతం వరకూ తగ్గవచ్చని చెబుతున్నారు. రుతుపవనాల మందగమనానికి ఎల్నినో ప్రభావం కొంత కారణం ఉండొచ్చని వాతావరణ శాస్త్రవేత్తలు అంచనా వేస్తున్నారు. ‘పసిఫిక్‌ మహా సముద్రంలోని పెరు, ఈక్వెడార్‌ల సముద్ర జలాలు సాధారణం కన్నా ఏడు డిగ్రీలు అదనంగా వేడెక్కి వీచే గాలుల్లో ఒత్తిడి అత్యధికమైంది. ఆ ప్రభావం భారత్ సమీప సముద్ర జలాలపైనా పడుతోంది.
Delay in Monsoon in 2023: ఎల్‌నీనో ప్రభావం తీవ్రంగా ఉంటే కరవు ఏర్పడే అవకాశాలున్నాయి. ఉదాహరణకు దీని ప్రభావంతో ఇండోనేసియా, మలేసియా, ఫిలిప్పీన్స్‌, భారత్ వంటి దేశాల్లో 1997-98, 2003, 2015 సంవత్సరాల్లో వర్షాలులేక కరవు పరిస్థితులు ఏర్పడి రైతులు పంటలు పండించే స్థితిలేక తీవ్రంగా నష్టపోయారు. అదే సమయంలో కుంభవృష్టి కురిసి పెరూ, అమెరికా వంటి దేశాల్లో అత్యధిక వర్షాలు వచ్చి వరదలు వచ్చాయి. ప్రతి రెండు నుంచి ఏడు సంవత్సరాలకు ఒకసారి ఎల్నినో ప్రభావం పడటం ఆనవాయితీగా మారిందంటూ’’ నిపుణులు పేర్కొంటున్నారు.
ఇవీ చదవండి:
