బంగాల్లో దీదీ (మమతా బెనర్జీ)ని ఎదుర్కొనేందుకు దాదా (గంగూలీ)ని భాజపాలో చేర్చుకుంటున్నట్లు ఊహాగానాలు వినిపిస్తున్నాయి. దాదా ఆదివారం.. బంగాల్ గవర్నర్ను కలవడం చర్చనీయాంశమైంది. అయితే ఈరోజు దిల్లీలోని ఫిరోజ్ షా కోట్ల మైదానంలో జరిగిన కార్యక్రమంలో గంగూలీ.. కేంద్ర హోంమంత్రి అమిత్ షాతో వేదిక పంచుకున్నారు.
కేంద్ర మాజీ మంత్రి, డీడీసీఏ మాజీ అధ్యక్షుడు అరుణ్ జైట్లీ విగ్రహ ఆవిష్కరణ కార్యక్రమం దిల్లీ ఫిరోజ్ షా కోట్ల మైదానంలో జరిగింది. ఈ కార్యక్రమానికి గంగూలీ కూడా హాజరయ్యారు. రూ.15 లక్షల విలువైన 6 అడుగుల జైట్లీ విగ్రహాన్ని అమిత్ షా ఆవిష్కరించారు. ఈ నేపథ్యంలో గంగూలీ-షా మధ్య రాజకీయంపై చర్చ జరిగిందా అన్నది ఉత్కంఠ రేకెత్తిస్తోంది.
ఖండించిన గంగూలీ..
అయితే అమిత్ షాతో భేటీ వార్తలను గంగూలీ ఖండించాడు. సదరు కార్యక్రమానికి దిల్లీ వెళ్లే సమయంలో విలేకరులు ప్రశ్నించగా అలాంటిదేం లేదని బదులిచ్చాడు.
"దిల్లీ క్రికెట్ అసోసియేషన్కు సంబంధించిన కార్యక్రమానికి నేను హాజరవుతున్నాను. అమిత్ షాతో ఎలాంటి భేటీ లేదు."
- సౌరవ్ గంగూలీ, బీసీసీఐ అధ్యక్షుడు
గవర్నర్ను కలవడంపై..
బంగాల్ గవర్నర్ను కలిసిన విషయంపైనా గంగూలీ స్పందిచాడు. భేటీని రాజకీయ కోణంలో చూడద్దని అన్నాడు.
"గవర్నర్ మిమ్మల్ని కలవాలి అనుకుంటే మీరు వెళ్లాల్సిందే. కనుక ఈ విషయాన్ని అలానే వదిలేస్తే మంచిది."
- సౌరవ్ గంగూలీ, బీసీసీఐ అధ్యక్షుడు
2019లో గంగూలీ.. అమిత్షాతో సమావేశం కావడంపై అప్పట్లో పెద్ద చర్చే నడిచింది. 2021 అసెంబ్లీ ఎన్నికల కోసం గంగూలీని పార్టీలోకి అమిత్ షా ఆహ్వానించినట్లు వార్తలు వచ్చాయి. అయితే ఆ వార్తలను అప్పుడే గంగూలీ ఖండించాడు. ప్రస్తుతం అమిత్ షా కుమారుడు జై షా బీసీసీఐ కార్యదర్శిగా ఉండటం గమనార్హం. కేంద్ర మంత్రి అనురాగ్ ఠాకూర్ సోదరుడు అరుణ్ ధుమాల్ బీసీసీఐ కోశాధికారిగా ఉన్నారు.
గంగూలీ వస్తే స్వాగతిస్తాం..
గంగూలీ భాజపాలోకి వస్తే స్వాగతిస్తామని 2019లో ఆ పార్టీ బంగాల్ అధ్యక్షుడు దిలీప్ ఘోష్ అన్నారు. ఆయన చేరిక పార్టీకి మరింత బలం తెస్తుందని చెప్పారు.
