AAP MLAs Missing: దిల్లీలో రాజకీయం వేడెక్కుతోంది. ఆమ్ ఆద్మీ పార్టీ ఎమ్మెల్యేలను భాజపా తమవైపు తిప్పుకోవడానికి ప్రయత్నిస్తోందని వస్తున్న వార్తల నేపథ్యంలో సీఎం అరవింద్ కేజ్రీవాల్ తన నివాసంలో పార్టీ ఎమ్మెల్యేలతో ప్రత్యేక సమావేశం ఏర్పాటు చేశారు. కానీ, సమావేశానికి కొందరు హాజరుకాలేదని, వారు ప్రస్తుతం అందుబాటులో లేరని వార్తలు వెలువడ్డాయి. ఆప్ నేతల వాదన మాత్రం భిన్నంగా ఉంది. ఈ సమావేశంలో మొత్తం 62 మంది ఆప్ ఎమ్మెల్యేలకుగానూ 53 మంది హాజరైనట్లు పార్టీ వర్గాలు తెలిపాయి. ఏడుగురు ఆప్ ఎమ్మెల్యేలు సమావేశానికి హాజరుకాలేక పోయారని వెల్లడించింది. సత్యేంద్ర జైన్ జైల్లో ఉండగా.. మరో ఎమ్మెల్యే ఫోన్ ద్వారా సమావేశంలో పాల్గొన్నారని స్పష్టం చేశారు పార్టీ ప్రతినిధి సౌరభ్ భరద్వాజ్.
తమ పార్టీలో చీలికలు తెచ్చేందుకు భారతీయ జనతాపార్టీ చేసిన ఆపరేషన్ కమలం విఫలమైందని ఆమ్ ఆద్మీ పార్టీ వెల్లడించింది. పార్టీలో చీలిక తెచ్చేందుకు 12 మంది ఎమ్మెల్యేలను భాజపా సంప్రదించినట్లు ఆప్ ప్రతినిధి సౌరభ్ భరద్వాజ్ ఆరోపించారు. ఒక్కొక్కరికి రూ.20 కోట్లు చొప్పున ఇచ్చి 40 మంది ఎమ్మెల్యేలను చీల్చేందుకు యత్నించిందని ఆరోపణలు చేశారు. అయితే ఆ ప్రయత్నాలను తమ ఎమ్మెల్యేలు తిప్పికొట్టారని అన్నారు. ఎప్పటికీ తాము ఆమ్ ఆద్మీలోనే ఉంటామని వారంతా స్పష్టం చేసినట్లు వెల్లడించారు.
"తమ పార్టీలోని 40 మంది ఎమ్మెల్యేలకు భాజపా ప్రభుత్వం ఒక్కొక్కరికి రూ.20 కోట్లు ఆశ చూపింది. భాజపాకు ఈ రూ.800 కోట్లు ఎక్కడివని సీబీఐ, ఈడీలు ప్రశ్నించాలి. పార్టీ మారే ప్రతిపాదనతో భాజపా నాయకులు తమను సంప్రదించారని ఆప్కు చెందిన 20-25 మంది ఎమ్మెల్యేలు తెలిపారు. సమావేశానికి హాజరు కాలేకపోయిన మా ఎమ్మెల్యేలు ట్రాఫిక్‌లో చిక్కుకుపోయి ఉండవచ్చు. కొన్ని పరిస్థితుల కారణంగా మేము వారిని సంప్రదించలేకపోయాము. అయితే ఆప్ ప్రభుత్వం పడిపోదని మేము దిల్లీ ప్రజలకు హామీ ఇస్తున్నాం. భాజపా ఎంపీ మనోజ్ తివారీ దిల్లీలో నూతన ఎక్సైజ్ పాలసీ విషయంలో కేజ్రీవాల్ స్పందిచడం లేదన్న వ్యాఖ్యలు చేసింది.. కేవలం ప్రజల దృష్టి మరల్చడానికే. ఇదంతా భాజపా చేస్తున్న పబ్లిక్ స్టంట్. కేజ్రీవాల్.. పార్టీ ఎమ్మెల్యేలతో కలిసి ఆపరేషన్ కమలం విఫలమవ్వాలని కోరుతూ మహాత్మా గాంధీ రాజ్ఘాట్ వద్దకు ప్రార్థన నిర్వహించ తలపెట్టాం.''
- సౌరభ్ భరద్వాజ్, ఆమ్ ఆద్మీ పార్టీ ప్రతినిధి
దిల్లీ ప్రభుత్వం మద్యం కుంభకోణం నుంచి దృష్టి మరల్చేందుకు కేజ్రీవాల్ నేతృత్వంలోని ఆప్ తీవ్రంగా ప్రయత్నిస్తోందని భాజపా ఆరోపించింది. పార్టీ మారే ప్రతిపాదనతో తమ ఎమ్మెల్యేలను సంప్రదించిన వారి పేర్లను వెల్లడించాలని ఆప్కు సవాల్ చేసింది. దిల్లీ ప్రభుత్వాన్ని కూలదోసేందుకు తమ ఎమ్మెల్యేలను తనవైపునకు లాక్కోవాలని భాజపా ప్రయత్నిస్తున్నట్లు ఆప్ ఇటీవల తీవ్ర ఆరోపణలు చేసింది. ఈ నేపథ్యంలోనే అత్యవసర సమావేశానికి పిలుపునిచ్చారు సీఎం అరవింద్ కేజ్రీవాల్.
ఇవీ చదవండి: పెగసస్పై సుప్రీం కీలక వ్యాఖ్యలు, 5 ఫోన్లలో మాల్వేర్ ఉంది కానీ
