'లవ్​ జిహాద్​' చట్టాల పరిశీలనకు సుప్రీం ఓకే

మత మార్పిడి నిరోధక చట్టం చెల్లుతుందో లేదో పరిశీలించేందుకు సుప్రీం కోర్టు అంగీకరించింది. అయితే ఈ చట్టంలోని వివాదాస్పద నిబంధనలపై స్టే విధించేందుకు మాత్రం నిరాకరించింది.

ఉత్తరప్రదేశ్​, ఉత్తరాఖండ్​ తీసుకొచ్చిన మత మార్పిడి నిరోధక చట్టం చెల్లుతుందో, లేదో పరిశీలించేందుకు సుప్రీంకోర్టు అంగీకరించింది. అదే సమయంలో ఈ 'లవ్​ జిహాద్'​ చట్టంలోని వివాదాస్పద నిబంధనలపై స్టే ఇచ్చేందుకు నిరాకరించింది.

'సిటిజన్​ ఫర్​ జస్టిస్​ అండ్​ పీస్​' ఎన్​జీఓ, న్యాయవాది విశాల్​ ఠాక్రేతో పాటు పలువురు దాఖలు చేసిన వ్యాజ్యాలపై విచారణ చేపట్టింది సీజేఐ జస్టిస్​ ఎస్​ఏ బోబ్డే నేతృత్వంలోని ధర్మాసనం. సంబంధిత వ్యాజ్యాలపై ఉత్తర్​ప్రదేశ్​, ఉత్తరాఖండ్​ ప్రభుత్వాలకు నోటీసులు జారీ చేసింది. నాలుగు వారాల్లోగా స్పందించాలని స్పష్టం చేసింది. ఆయా రాష్ట్రాల వాదనలు వినకుండా చట్టంలోని నిబంధనలపై స్టే విధించలేమని పిటిషనర్లకు తెలిపింది.

ఇదీ చూడండి:- రైతు నిరసనలపై ఈనెల 11న సుప్రీం విచారణ

సుప్రీం తీవ్ర అసంతృప్తి..

వర్చువల్​ కోర్టు వ్యవస్థ తమ అవసరాలకు తగ్గట్టుగా పని చేయడం లేదని అత్యున్నత న్యాయస్థానం తీవ్ర అసంతృప్తి వ్యక్తం చేసింది. ఈ విధానంలో కోర్టు కార్యకలాపాలు సాగించడం చాలా కష్టంగా మారిందని పేర్కొంది. పక్కనే ఉన్న దిల్లీ కోర్టులో అనుసరిస్తున్న వర్చువల్​ కోర్టు ప్రక్రియలో ఎలాంటి అవాంతరాలు కలగడం లేదని.. మరి సర్వోన్నత న్యాయస్థానంలో ఇలా ఎందుకు జరుగుతోందని ప్రశ్నించింది. ఈ విషయంపై చర్యలు చేపట్టాలని అత్యున్నత న్యాయస్థాన ప్రధాన కార్యదర్శిని ఆదేశించింది.

కరోనా సంక్షోభం కారణంగా 2020 మార్చి​ నుంచి విచారణను వీడియో కాన్ఫరెన్స్​ ద్వారా చేపడుతోంది సుప్రీంకోర్టు.

ఇదీ చూడండి:- సెంట్రల్​ విస్టా ప్రాజెక్ట్​కు సుప్రీంకోర్టు అనుమతి