మధ్యప్రదేశ్ ఛింద్వాఢలో వింత ఘటన జరిగింది. ఓ వ్యక్తి మరణించిన మూడేళ్ల తర్వాత.. అతడికి లోన్ మంజూరు చేశారు బ్యాంక్ అధికారులు. తాజాగా లోన్ తిరిగి చెల్లించడం లేదంటూ మృతుడి కుటుంబ సభ్యులకు నోటీసులు అందించారు. అయితే, తమకు బ్యాంక్ నుంచి ఎలాంటి రుణం అందలేదని మృతుడి కుమారుడు వాపోతున్నాడు.
చౌరాయ్ తాలుకాలోని తూన్వాఢ గ్రామానికి చెందిన అజబ్ సింగ్ వర్మ అనే రైతు 2006లో లోన్ కోసం స్టేట్ బ్యాంక్ ఆఫ్ ఇండియా ఛింద్వాఢ శాఖలో దరఖాస్తు చేసుకున్నాడు. ఆ తర్వాత కొన్ని రోజులకే అతడు మరణించాడు. అందరూ లోన్ గురించి మరిచిపోయిన మూడేళ్ల తర్వాత అతడి పేరుపై రుణాన్ని మంజూరు చేసింది ఎస్బీఐ. అయితే, 2018లో కమల్నాథ్ నేతృత్వంలోని కాంగ్రెస్ ప్రభుత్వం రాష్ట్రంలో అధికారంలోకి వచ్చాక.. రైతులకు రూ. 2 లక్షల లోపు రుణాలను మాఫీ చేయాలని నిర్ణయించింది. దీంతో బ్యాంక్ అధికారులు అజబ్ కుటుంబ సభ్యులకు లేఖ రాశారు.
ఇక్కడ వరకు బాగానే ఉన్నా.. అసలు కథ ఇక్కడే అడ్డం తిరిగింది. రుణాన్ని మాఫీ చేస్తే సంతోషించాల్సిన కుటుంబ సభ్యులు షాక్కు గురయ్యారు. అప్పటి వరకు అజబ్ కుటుంబ సభ్యులకు లోన్ మంజూరైన విషయం తెలియదు. తమకు ఎలాంటి నగదు చెల్లించకుండానే.. రుణమాఫీ చేసినట్లు నోటీసులు ఎలా ఇచ్చారని ఆశ్యర్యం వ్యక్తం చేశారు. మరోవైపు రుణమాఫీ చేస్తున్నట్లు నోటీసులు పంపిన బ్యాంక్ అధికారులు ప్లేట్ మార్చారు. రూ. 2,75,000 తిరిగి చెల్లించాల్సిందేనంటూ అజబ్ కుటుంబానికి మరోసారి నోటీసులు పంపించారు. లోన్ కట్టాలంటూ తమను వేధిస్తున్నారని మృతుడి కుమారుడు శంబూ ఆవేదన వ్యక్తం చేశాడు.
"మా నాన్న ఓ రైతు. ఆయన 2006లో వ్యవసాయ రుణం కోసం దరఖాస్తు చేసుకున్నాడు. కానీ అదే సంవత్సరం మా నాన్న చనిపోయారు. 2009లో బ్యాంక్ మాకు లోన్ మంజూరు చేసినట్లు నోటీసులు పంపింది. మేము తీసుకోని రుణానికి మమ్మల్ని కట్టాలంటూ.. అనేక సార్లు వేధించారు. అసలు మేము బ్యాంకు నంచి ఎలాంటి రుణం పొందలేదు. ఈ ఫేక్ లోన్ కేసు వల్ల మాకు ఏ బ్యాంక్ కూడా రుణాన్ని మంజూరు చేయడం లేదు."
--శంబూ, అజబ్ కుమారుడు
బ్యాంక్ అధికారుల చర్యలతో విసిగిపోయిన అజబ్ కుమారుడు శంబూ.. కలెక్టర్ను ఆశ్రయించాడు. తీసుకోని రుణాన్ని చెల్లించాలంటూ.. బ్యాంక్ అధికారులు తమను వేధిస్తున్నారంటూ ఫిర్యాదు చేశాడు.
ఇవీ చదవండి : 'సర్ప్రైజ్ ఇస్తా.. కళ్లు మూసుకో' అని కత్తితో పొడిచి హత్య.. శవాన్ని ముక్కలు చేసి..
ప్రియుడితో పారిపోయేందుకు ప్లాన్.. తనలా ఉన్న మరో అమ్మాయిని చంపి ఎస్కేప్
