అఫ్గానిస్థాన్ను తాలిబన్లు హస్తగతం చేసుకోవడంపై సమాజ్వాదీ పార్టీ ఎంపీ ఒకరు చేసిన వ్యాఖ్యలు వివాదాస్పదమయ్యాయి. తాలిబన్లు తమ దేశాన్ని స్వేచ్ఛగా ఉంచాలని కోరుకుంటున్నారని ఉత్తర్ప్రదేశ్ సంభాల్ లోక్సభ ఎంపీ షఫీకర్ రహమమాన్ బార్క్ వ్యాఖ్యానించారు. దీన్ని భారత స్వాతంత్ర్యోద్యమంతో పోల్చి చెప్పారు. ఈ మేరకు ఆయన విలేకరుల సమావేశంలో మాట్లాడారు.
"అఫ్గాన్లో రష్యా, అమెరికా అజమాయిషీని తాలిబన్లు అనుమతించటం లేదు. ప్రస్తుతం వారు తమ దేశాన్ని తామే పరిపాలించాలనుకుంటున్నారు. దేశాన్ని బ్రిటిష్ పరిపాలించినప్పుడు.. వారికి వ్యతిరేకంగా దేశమంతా కలిసి పోరాడింది. అదే తరహాలో వారు స్వేచ్ఛ కోరుకుంటున్నారు. అది వారి అంతర్గత వ్యవహారం. దాంట్లో మన ఎలా జోక్యం చేసుకోగలం?"
-షఫికర్ రహమాన్ బార్క్, ఎంపీ
కాగా, ఈ విషయంపై దేశద్రోహం చట్టం కింద పోలీసులు కేసు నమోదు చేశారు. భాజపా నేత రాజేశ్ సింఘాల్ ఇచ్చిన ఫిర్యాదు మేరకు ఎఫ్ఐఆర్ దాఖలు చేశారు.
యోగి మండిపాటు
బార్క్ వ్యాఖ్యలపై ఉత్తర్ప్రదేశ్ ముఖ్యమంత్రి యోగి ఆదిత్యానాథ్ మండిపడ్డారు. తాలిబన్లను బార్క్ సమర్థించడం సిగ్గు చేటన్నారు.
"మనం ప్రజాస్వామ్య పాలనలో ఉన్నాం. అలాంటి మనం ఏ విధంగా ఆలోచిస్తున్నాం? మానవత్వాన్ని మంటలో కలిపేస్తున్న వారికి మనం మద్దతునిస్తున్నాం."
-యోగి ఆదిత్యానాథ్, ఉత్తర్ప్రదేశ్ ముఖ్యమంత్రి
అంతకుముందు ఉత్తర్ప్రదేశ్ ఉపముఖ్యమంత్రి కేశవ్ ప్రసాద్ మౌర్య కూడా బార్క్ వ్యాఖ్యలను ఖండించారు. "నేను ఎంపీ మాటలను వినలేదు. కానీ, ఇలాంటి వ్యాఖ్యలను ఆయన చేసినట్లైతే.. ఆయనకు, పాకిస్థాన్ ప్రధానమంత్రి ఇమ్రాన్ ఖాన్కు పెద్ద తేడా లేదు" అని చెప్పారు.
ఇదీ చూడండి: శాంతి జపంతో మీడియా ముందుకు తాలిబన్లు
ఇదీ చూడండి: అఫ్గాన్పై మోదీ కీలక భేటీ- వారిని తీసుకురావాలని ఆదేశం!
