Jos Alukkas Theft: తమిళనాడు వెల్లూరులో ఇటీవల జాస్ అలుకాస్ స్టోర్లో దొంగతనానికి పాల్పడ్డ నిందితుడు పోలీసులకు చిక్కాడు. ఒదుగతుర్ ప్రాంతంలో అనుమానాస్పదంగా కనిపించిన నిందితుడిని అదుపులోకి తీసుకుని దర్యాప్తు చేపట్టగా.. దొంగతనానికి పాల్పడ్డట్టు తేలిందని పోలీసులు స్పష్టం చేశారు. చోరీ చేసిన నగలను నిందితుడు.. ఓ శ్మశానంలో దాచి ఉంచాడని వెల్లడించారు. త్వరలోనే ఈ నగలను వెలికితీస్తామని స్పష్టం చేశారు. ఈ దొంగతనంలో నిందితుడికి ఎవరైనా సహకరించారా? అన్న కోణంలోనూ విచారిస్తున్నట్టు స్పష్టం చేశారు.
తోటపాలయం ధర్మరాజ ఆలయం సమీపంలో ఉన్న జాస్ అలుకాస్ స్టోర్లో ఈనెల 15న.. నిందితుడు 15 కిలోల బంగారం, రూ.8 కోట్లు విలువ చేసే వజ్రాల ఆభరణాలను చోరీ చేశాడు. భవనం వెనుక భాగంలోని గోడకు కన్నం వేసి స్టోర్లోకి ప్రవేశించిన నిందితుడు.. తనని ఎవరూ గుర్తించకుండా ఉండేందుకు మాస్క్ ధరించాడు. సీసీ కెమెరాలకు స్ప్రే కొట్టి ఈ చోరీకి పాల్పడ్డాడు. ఇందుకు సంబంధించిన ఫూటేజ్ సోషల్ మీడియాలో వైరలైంది.
ఇదీ చూడండి : భర్త నేలకొరుగుతున్నా.. జెండా ఎగరేసి!
