75 Reservation in Private Jobs: 'స్థానికులకే ఉద్యోగాలు' అనే అంశంపై హరియాణా హైకోర్టు ఇచ్చిన మధ్యంతర ఉత్తర్వులను సుప్రీంకోర్టు పక్కకు పెట్టింది. నెలరోజుల్లోగా సమస్యను పరిష్కరించాలని హైకోర్టుకు సూచించింది. ప్రైవేటు ఉద్యోగాల్లో 75 శాతం స్థానికులకే చెందాలని హరియాణా ప్రభుత్వం ఇటీవల ఓ చట్టం చేసింది. దీనిపై ఆ రాష్ట్ర హైకోర్టు స్టే విధించింది. జస్టిస్ ఎల్ నాగేశ్వర రావు, జస్టిస్ పమిడిఘంటమ్ శ్రీ నరసింహతో కూడిన సుప్రీం ధర్మాసనం ఈ మేరకు తాజాగా తీర్పు వెలువరించింది.
"నాలుగు వారాల గడువులోగా విచారణ జరిపేలా హైకోర్టును అభ్యర్థించాలని ప్రతిపాదిస్తున్నాం. మెరిట్ వ్యవహారంలో మేము కల్పించుకోవాలని భావించట్లేదు. ఎలాంటి వాయిదాలు లేకుండా ఇరుపక్షాలు కోర్టు ముందు హాజరు కావాలి. ఈ మధ్యలో ప్రైవేటు సంస్థల యజమానులపై ప్రభుత్వం ఎలాంటి చర్యలు తీసుకోవద్దు."
- సుప్రీంకోర్టు
ప్రైవేటు ఉద్యోగాల్లో 75 శాతం స్థానికులకే చెందాలనే చట్టాన్ని హైకోర్టు నిలుపుదల చేయడంపై హరియాణా ప్రభుత్వం సుప్రీంకోర్టును ఆశ్రయించింది. ఈ మేరకు విచారణ జరిపిన సుప్రీం తీర్పు వెలువరించింది.
ఇదీ చదవండి: 'ఇష్టారీతి భూముల కేటాయింపును నిలిపేయాలి'
