కరోనా రోగులను ఆస్పత్రుల్లో చేర్చుకునేందుకు రూపొందించిన జాతీయ విధానాన్ని సవరించింది కేంద్ర ఆరోగ్య శాఖ. ఇకపై కరోనా పాజిటివ్ రిపోర్టు లేకున్నా రోగులను కొవిడ్ ఆరోగ్య కేంద్రాల్లో ప్రవేశం కల్పించాలని స్పష్టం చేసింది. వైరస్ లక్షణాలున్న ఎవరినైనా చేర్చుకోవాల్సిందేనని పేర్కొంది. రోగులు ఏ ప్రాంతానికి చెందిన వారైనా సరే.. సేవలు అందించాలని సూచించింది. సరైన గుర్తింపు కార్టు లేదని, స్ధానికుల కాదనే కారణంతో ఎవరినీ ప్రవేశానికి నిరాకరించవద్దని తేల్చి చెప్పింది. ఔషధాలు, ఆక్సిజన్ వంటి సేవలు అందరికీ అందించాలని పేర్కొంది. దేశంలో కరోనా ప్రళయం కొనసాగుతున్న వేళ వైరస్ బాధితులకు కేంద్రం నిర్ణయం కాస్త ఉపశమనం కల్పించింది.
ఈ మార్పులను అన్ని రాష్ట్రాలు, కేంద్ర పాలిత ప్రాంత ప్రభుత్వ పరిధిలోని ఆసుపత్రులు, కేంద్ర ప్రభుత్వ అధీనంలో ఉన్న ఆసుపత్రులు, ప్రైవేటు ఆరోగ్య కేంద్రాలు తప్పనిసరిగా పాటించాలని కేంద్రం ఆదేశించింది.
నూతన మార్గదర్శకాలు ఇవే..
- కొవిడ్ ఆరోగ్య కేంద్రం(ఆసుపత్రులు)లో చేర్చుకునేందుకు కొవిడ్ పాజిటివ్ నిర్దారణ పత్రం తప్పనిసరి కాదు. వైరస్ అనుమానిత బాధితులను ఆసుపత్రుల్లో చేర్చుకుని చికిత్స అందించాల్సిందే.
- కారణమేదైనా సరే.. ఏ రోగికి కూడా వైద్య సేవలు నిరాకరించొద్దు. వేరే ప్రాంతానికి చెందిన రోగులకు కూడా ఆక్సిజన్ లేదా అత్యవసర ఔషధాలు ఇవ్వాలి.
- వేరే నగరం నుంచి వచ్చిన బాధితులు సరైన ధ్రువీకరణ పత్రాలు చూపించలేదని ఆసుపత్రుల్లో చేర్చుకోకుండా ఉండొద్దు. ఎలాంటి గుర్తింపు కార్డు లేకున్నా.. ఇతర ప్రాంతాలకు చెందిన వారిని చేర్చుకోవాలి.
- అన్ని ఆసుపత్రులు డిశ్చార్జ్‌ పాలసీని కచ్చితంగా పాటించాలి. రోగుల ఆరోగ్య పరిస్థితిని ఆధారంగానే చేసుకునే ఆసుపత్రిలో చేర్చుకోవాలి. అంతగా హాస్పిటల్‌ అవసరం లేనివారిని డిశ్చార్జ్‌ చేయాలి.
ఈ నూతన మార్గదర్శకాలపై ఆయా రాష్ట్రాలు, కేంద్రపాలిత ప్రాంతాల ప్రధాన కార్యదర్శులు మూడు రోజుల్లోగా ఉత్తర్వులు, సర్క్యులర్లు జారీ చేయాలని కేంద్ర ఆరోగ్యశాఖ సూచించింది.
