కరోనా మహమ్మారి కరాళ నృత్యం చేస్తోంది. దేశంలో ఎన్నడూ లేనంత స్థాయిలో విరుచుకుపడుతోంది. ఆసుపత్రుల్లోని పడకలన్నీ నిండిపోయాయి. శ్మశానాల్లో అంత్యక్రియలకూ గంటల కొద్ది వేచిచూడాల్సి వస్తోంది.
సూరత్లో 3 రోజుల్లో 90 మంది మృతి
గుజరాత్లోని సూరత్లో కరోనా కల్లోలం సృష్టిస్తోంది. గడిచిన 3 రోజుల్లోనే 90 మంది కొవిడ్ బాధితులు మృతి చెందారు. అంతిమ సంస్కారాల కోసం శ్మశానవాటికల వద్ద గంటల తరబడి వేచిచూడాల్సిన పరిస్థితులు తలెత్తాయి. ముఖ్యంగా లింబాయత్ ప్రాంతంలోని ముక్తిధామ్, పాల్లోని శ్రీ కైలాష్ మోక్షధామ్ ట్రస్ట్ శ్మశానవాటికకు మృతదేహాలు కుప్పలుగా వస్తున్నాయి. అక్కడ మొదటి రోజు 10, రెండో రోజు 30, మూడో రోజు 17 మృతదేహాలకు అంత్యక్రియలు నిర్వహించారు.
బెంగళూరులో..
కర్ణాటకలోని బెంగళూరు నగర మున్సిపాలిటీ శ్మశానవాటికకు వస్తున్న కరోనా మృతదేహాలతో అక్కడి ఉద్యోగులపై తీవ్ర ఒత్తిడి పడుతోంది. శ్మశానవాటిక సమీపంలో మృతదేహాలతో ఉన్న అంబులెన్సులు బారులు తీరాయి. ఒక మృతదేహాన్ని దహనం చేసేందుకు కనీసం గంటన్నర సమయం పడుతోందని సిబ్బంది తెలిపారు. అయితే శ్మశానవాటికలో సేవలందించే తమకు పీపీఈ కిట్లు, గ్లవ్స్, శానిటైజర్ వంటి కనీస సౌకర్యాలు లేవని వారు ఆందోళన వ్యక్తం చేశారు.
కొవిడ్ కారణంగా మరణించిన వారి మృతదేహాల అంతిమ సంస్కారాలకు ఐదు శ్మశానవాటికలను కేటాయించారు. అయితే కొన్నిచోట్ల ఈ యంత్రాలు సరిగా పనిచేయట్లేదని ప్రజలు ఆరోపిస్తున్నారు.
దేశ రాజధానిలో స్థలం కొరత..
దిల్లీ ఐటీఓ ప్రాంతంలోని అతిపెద్ద శ్మశానవాటిక అయిన జాదిద్ ఖబ్రస్థాన్లో కరోనా మృతులను ఖననం చేసేందుకు స్థలం లేదని నిర్వాహకులు తెలిపారు. మరో 150-200 మృతదేహాలను ఖననం చేసేందుకు మాత్రమే స్థలం ఉన్నట్లు తెలిపారు.
ఇవీ చదంవడి: కొవిడ్ పంజా-'మహా'లో కొత్తగా 59వేల కేసులు
