బంగాల్ ప్రజలు కోరితే రాజీనామా చేయడానికి తాను సిద్ధంగా ఉన్నానని అన్నారు కేంద్ర హోంమంత్రి అమిత్ షా. నాల్గోదశ పోలింగ్‌ సందర్భంగా జరిగిన కూచ్బిహార్ కాల్పుల ఘటనపై అమిత్ షా రాజీనామా చేయాలని సీఎం మమతా బెనర్జీ డిమాండ్ చేశారు. దీనిపై స్పందించిన షా ఈ వ్యాఖ్యలు చేశారు.
"నన్ను రాజీనామా చేయమని దీదీ డిమాండ్ చేశారు. బంగాల్ ప్రజలు కోరితే.. వారి ముందు తలవంచి అలా చేయడానికి సిద్ధంగా ఉన్నాను."
-అమిత్ షా, కేంద్ర హోంమంత్రి
ఉత్తర 24 పరగణాల జిల్లాలోని బసీర్హాట్లో నిర్వహించిన ప్రచార ర్యాలీలో పాల్గొన్న షా.. ఎన్నికల్లో తృణమూల్ కాంగ్రెస్కు ఓటమి తప్పదని అన్నారు. మే 2న దీదీ.. సీఎం పీఠం దిగాల్సిందేనన్నారు.
ఇదీ చూడండి: కూచ్ బిహార్ కాల్పులే ప్రచారాస్త్రం!
భాజపా కుట్ర
మరోవైపు.. ప్రజలను బెదిరించడానికి కూచ్బిహార్ ఘటనతో భాజపా కుట్ర పన్నిందని ఆరోపించారు దీదీ. జల్పాయ్గుడి జిల్లాలో ప్రచారం నిర్వహించిన దీదీ.. భాజపాకు ఓటు వేయొద్దని ప్రజలకు విజ్ఞప్తి చేశారు.
ఈ సందర్భంగా సీఐఎస్ఎఫ్ సిబ్బందిపై విమర్శలు గుప్పించారు మమత. "ఎవరైన గందరగోళానికి పాల్పడినట్లు భావిస్తే.. వారితో మాట్లాడాలి. లేదా లాఠీ ఛార్జ్ చేయాలి. అంతేకానీ.. తుపాకులు ఎలా తీస్తారు?" అని బలగాలను ప్రశ్నించారు.
ఇదీ చూడండి: 'కూచ్బిహార్ ఘటన మారణహోమమే'
