పార్లమెంట్ రెండు విడతల బడ్జెట్ సమావేశాల్లో రెండు వారాలపాటు సాగిన తొలి భాగంలో.. రాజ్యసభ 99 శాతం ప్రోడక్టివిటీ సాధించిందని ఛైర్మన్ ఎం వెంకయ్య నాయుడు శుక్రవారం తెలిపారు. ఈ విషయంపై హర్షం వ్యక్తం చేశారు.
ఏప్రిల్ 1 నుంచి ప్రారంభమయ్యే ఆర్థిక ఏడాదికి సంబంధించిన బడ్జెట్పై విత్త మంత్రి నిర్మలా సీతారామన్ ప్రసంగం అనంతరం.. సభ మరో మూడు వారాలకు వాయిదా పడింది. అయితే.. వివిధ మంత్రిత్వ శాఖలకు బడ్జెట్ కేటాయింపులను పరిశీలించేందుకు పార్లమెంటరీ కమిటీలు ఈ విరామాన్ని అనుమతిస్తాయి. ద్వితీయార్ధం బడ్జెట్ సమావేశాలు వచ్చే నెల 8 నుంచి ప్రారంభం కానున్నాయి.
మొత్తంగా.. ఈ వారంలో ఎగువసభ పనికాలం 113 శాతంగా నమోదైనట్టు పేర్కొన్నారు వెంకయ్య. షెడ్యూల్ ప్రకారం మొత్తం చర్చా కాలం 45గంటల 4నిమిషాల పాటు కొనసాగిందని, అంతరాయాల కారణంగా అరగంట సమయం వృథాగా పోయిందన్నారు. అయితే.. తొలి వారంలో ఇది కేవలం 82 శాతానికే పరిమితమైందని చెప్పారు. ఆ వారం షెడ్యూల్లో 27 గంటల 11నిమిషాల పాటు చర్చలు జరిగినట్టు తెలిపారు వెంకయ్య. మొత్తం కార్యాచరణ సమయంలో.. 60శాతానికిపైగా రాష్ట్రపతి ప్రసంగానికి ధన్యవాదాలు తెలపడం, బడ్జెట్ అంశాలపైనే చర్చించినట్టు ఆయన స్పష్టం చేశారు. కేవలం ఈ రెండు అంశాలపైనే 100 మంది సభ్యులు మాట్లాడారన్నారు.
రెండు వారాల ఈ సమావేశంలో.. మూడు బిల్లులు ఆమోదం పొందాయని వెంకయ్య పేర్కొన్నారు. ఇదే సమయంలో.. ప్రజా ప్రయోజనాలకు సంబంధించి మొత్తం 88 సమస్యలు లేవనెత్తినట్టు తెలిపారాయన.
ఇదీ చదవండి: ఆ రెండు రోజులు లోక్సభ పనికాలం 150శాతం!
