రక్షణ మంత్రి రాజ్నాథ్ సింగ్ నేడు లద్దాఖ్ వెళ్లనున్నారు. తూర్పు లద్దాఖ్లోని సరిహద్దు ప్రాంతాల్లో ప్రతిష్టంభన కొనసాగుతున్న నేపథ్యంలో చైనాను ఎదుర్కొనేందుకు బలగాల సన్నద్ధతను సమీక్షించనునన్నట్లు సమాచారం. ఈ పర్యటనలో ఆర్మీ చీఫ్ జనరల్ ఎంఎం నరవాణే కూడా పాల్గొననున్నారు. సరిహద్దు ప్రతిష్టంభనపై చైనాతో చర్చలు జరిగిన రెండు రోజులకే రక్షణ మంత్రి ఈ పర్యటన చేపట్టడం ప్రాధాన్యం సంతరించుకుంది.
పాంగాంగ్ సరస్సు నుంచి చైనా తన బలగాలను ఉపసంహరించుకున్నాక రాజ్నాథ్ తూర్పు లద్దాఖ్లో పర్యటించడం ఇదే తొలిసారి.
మూడు రోజుల పాటు సాగే ఈ పర్యటనలో రాజ్నాథ్.. బార్డర్ రోడ్స్ ఆర్గనైజేషన్ ఆధ్వర్యంలో నిర్మించిన పలు ప్రాజెక్టులను ప్రారంభిస్తారని రక్షణ మంత్రిత్వ కార్యాలయం వెల్లడించింది. క్షేత్రస్థాయి పరిస్థితులను తెలుసుకునేందుకు రాజ్నాథ్ పలు కీలక ప్రాంతాలను సందర్శించనున్నారని అధికారిక వర్గాలు పేర్కొన్నాయి. 14 కార్ఫ్స్ ప్రధాన కార్యాలయంలో రాజ్నాథ్కు సైన్యం.. లద్దాఖ్లోని వాస్తవాధీన రేఖ వద్ద పరిస్థితులను వివరించనున్నట్లు వెల్లడించాయి.
ఇదీ చదవండి : 'వచ్చే ఏడాదికి స్వదేశీ విమాన వాహక నౌక'
