రాజస్థాన్లోని పాలీ జిల్లాలో ఒళ్లుగగుర్పొడిచే ఘటన జరిగింది. పాఠశాలలో బ్లేడ్తో విద్యార్థిని గొంతు కోశాడు ఓ బాలుడు.
బితోఢ కలాన్ గ్రామంలోని ప్రభుత్వ పాఠశాలలో యశోదా మీనా తొమ్మిదవ తరగతి చదువుతోంది. మంగళవారం లంచ్ సమయంలో బాలిక తరగతి బయటికి వచ్చింది. ఆ సమయంలోనే ఆమె దగ్గరికి 12వ తరగతి చదవుతున్న సోహన్లాల్ మీనా వచ్చాడు. చేతిలో అప్పటికే వెంటతెచ్చుకున్న బ్లేడ్తో బాలిక మెడను కోశాడు.
బాలికపై నిందితుడి ఆరా..
ఈ విషయం తెలుసుకున్న ఉపాధ్యాయులు.. బాధితురాలిని వెంటనే మార్వాఢ్ జంక్షన్లోని ఆస్పత్రికి తరలించారు. అటు నుంచి పాలీ జిల్లా ఆస్పత్రికి తీసుకెళ్లారు. బాధితురాలి పరిస్థితి విషమంగా ఉందని వైద్యులు తెలిపారు. అయితే.. బాలిక బతికి ఉందా? లేదా తెలుసుకోవడానికి నిందితుడు ఆస్పత్రికి వచ్చి మరీ ఆరా తీశాడు. ఈ విషయం తెలుసుకున్న బాధిత కుటుంబ సభ్యులు నిందితుని కోసం వెతికారు. కానీ అతడు తప్పించుకున్నాడు.
ఈ ఘటనకు గల కారణాలను చెప్పే పరిస్థితిలో బాలిక లేదని పోలీసులు వివరించారు. నిందితున్ని పట్టుకున్న తర్వాతే అసలు విషయాలు తెలుస్తాయని చెప్పారు. పాఠశాల ఉపాధ్యాయులు, విద్యార్థుల నుంచి సమాచారాన్ని సేకరిస్తున్నామని వెల్లడించారు.
