సాధారణంగా ఆలయాల్లో అమ్మవారికి పండ్లు, తీపి పదార్థాలు ప్రసాదంగా ఇస్తుంటారు. కానీ, ఛత్తీస్గఢ్ రాయ్పుర్కు చెందిన ఓ ఆలయంలో స్పైసీ పదార్థాలు ప్రసాదంగా సమర్పిస్తారు. ఇంతకీ ఇలా ఎందుకు చేస్తున్నారంటే..
దేశంలోనే మొదటి ఆలయం..
దుర్గామాత అవతారమైన ధూమావతి అమ్మవారి ఆలయానికి చాలా ప్రత్యేకతలున్నాయి. ఇది రాయ్పుర్ పాతబస్తీ ప్రాంతంలోని శీత్లా మందిర్ సమీపంలో ఉంది. ఈ ఆలయాన్ని నీరజ్ సాయిని అనే పూజారి పదేళ్ల క్రితమే నిర్మించారు.
అయితే.. ధూమావతి అమ్మవారికి.. సమోసాలు, కచోరీ, మిర్చి భజ్జీ, ఆలూబొండా వంటి స్పైసీ పిండివంటకాలు ప్రసాదంలా సమర్పిస్తుంటారు అక్కడి ప్రజలు. ఈ విధంగా అమ్మవారిని ఆరాధించడం మరెక్కడా లేదని, దేశంలో పీఠం ఏర్పాటు చేసిన మొదటి ధూమావతి అమ్మవారి ఆలయమిదే అని పూజారి నీరజ్ చెబుతున్నారు. అమ్మవారికి స్పైసీ ఫుడ్ అంటేనే ఇష్టం అని ప్రజలు నమ్ముతారని అన్నారు.
జ్యోతి బిందు రూపంలో అమ్మవారిని ఆరాధిస్తామని నీరజ్ చెప్పారు. విగ్రహానికి ఓ ప్రత్యేక రూపం అంటూ లేదని పేర్కొన్నారు.
శుక్రవారం జ్యేష్ఠ శుక్ల అష్టమి సందర్భంగా.. అమ్మవారికి ఘనంగా పూజలు నిర్వహించారు. పండ్లు, స్వీట్లతో పాటు సమోసాలు ప్రసాదంగా ఉంచారు. అయితే.. కరోనా కారణంగా ఈ ఏడాది అతి తక్కువ మంది సమక్షంలో పూజలు నిర్వహించినట్లు పూజారి నీరజ్ సాయిని వెల్లడించారు.
ఇదీ చదవండి:'కరోనా మాత' ఆలయం కూల్చివేత
