నేషనల్ హెరాల్డ్ మనీలాండరింగ్‌ కేసులో కాంగ్రెస్ అగ్రనేత రాహుల్ గాంధీపై ఈడీ విచారణ రెండో రోజు కొనసాగింది. దాదాపు తొమ్మిది గంటల పాటు విచారించిన ఈడీ.. బుధవారం కూడా హాజరు కావాలని రాహుల్కు సమన్లు జారీ చేసింది. పీఎంఎల్‌ఏ సెక్షన్ 50 కింద విచారిస్తున్న ఈడీ.. రెండో రోజు కూడా ఇంకా ప్రశ్నలు పూర్తి కానందున రేపు మరోసారి హాజరు కావాలని సమన్లులో పేర్కొంది. దీంతో ఇప్పటివరకు 19 గంటల పాటు రాహుల్‌ను విచారించారు. రెండోరోజు విచారణలో భాగంగా పలు ప్రశ్నలు సంధించిన ఈడీ అధికారులు.. రాహుల్ స్టేట్‌మెంట్‌ రికార్డు చేశారు. ఈ రోజు ఉదయం 11.05 గంటలకు రాహుల్ గాంధీ ఈడీ కార్యాలయానికి చేరుకోగా.. అధికారులు మధ్యాహ్నం ఆయనకు గంట పాటు లంచ్ బ్రేక్ ఇచ్చారు. దీంతో రాహుల్ ఎన్‌ఫోర్స్‌మెంట్‌ డైరెక్టరేట్‌ (ఈడీ) కార్యాలయం నుంచి మధ్యాహ్నం 3.45గంటల సమయంలో బయటకు వచ్చారు. లంచ్ బ్రేక్ ముగిసిన అనంతరం సాయంత్రం 4.45 గంటల సమయంలో తిరిగి ఈడీ కార్యాలయానికి చేరుకున్నారు.
రాహుల్ గాంధీపై ఈడీ విచారణను నిరసిస్తూ రెండో రోజు కూడా కాంగ్రెస్ శ్రేణులు దిల్లీలో నిరసనలు తెలిపాయి. జన్‌పథ్‌ వద్ద నిరసన తెలిపిన ఆ పార్టీ సీనియర్‌ నేతలు కేసీ వేణుగోపాల్‌, అధిర్‌ రంజన్‌ చౌధురి, గౌరవ్‌ గగొయ్‌, దీపేందర్‌ సింగ్ హుడా, రంజీత్‌ రంజన్‌, ఇమ్రాన్‌ ప్రతాప్‌ గ్రహి తదితరులను పోలీసులు అదుపులోకి తీసుకొని బాదార్‌పూర్‌ పోలీస్‌ స్టేషన్‌కు తరలించారు.
