కాంగ్రెస్ నేత రాహుల్ గాంధీపై కేంద్ర ఆర్థిక మంత్రి నిర్మలా సీతారామన్ లోక్సభలో శనివారం ధ్వజమెత్తారు. రాజ్యాంగ విధివిధానాలను అవమానిస్తూ, అవాస్తవ ఆరోపణలు చేస్తూ దేశ వినాశకారిగా మారుతున్నారని వ్యాఖ్యానించారు. అనవసర ఆరోపణలు చేసే రాహుల్కు బడ్జెట్పై కేంద్ర వివరణ వినే సహనం కూడా లేదని ఎద్దేవా చేశారు. బడ్జెట్పై రాహుల్ గాంధీ గురువారం చేసిన వ్యాఖ్యలకు బదులుగా నిర్మల ఈ విధంగా స్పందించారు.
"కాంగ్రెస్ ద్వంద్వ వైఖరిని మనం గుర్తించాలి. ప్రజాస్వామ్యాన్ని ప్రతిబింబించే పార్లమెంట్ వ్యవస్థపైన వారికి పూర్తిగా నమ్మకం పోయిందన్న విషయం స్పష్టం అవుతోంది. సాగు చట్టాలను ప్రతిపాదించిన కాంగ్రెసే ఇప్పుడు ఎందుకు యూటర్న్ తీసుకుందో అన్న విషయం నాకు తెలుకోవాలని ఉంది. కానీ వారి నుంచి ఎలాంటి స్పందన లేదు."
-నిర్మలా సీతారామన్, కేంద్ర ఆర్థిక మంత్రి
పంజాబ్ సంగతేంటి..?
వ్యవసాయ చట్టాలపైన మాట్లాడిన రాహుల్.. పంజాబ్లో రైతుల సమస్యల గురించి ఎందుకు మాట్లాడలేదని నిర్మల ప్రశ్నించారు. రాజస్థాన్, మధ్యప్రదేశ్, ఛత్తీస్గఢ్ రాష్ట్రాల్లో కాంగ్రెస్ తన హయాంలో రుణమాఫీలు ఎందుకు చేయలేదో రాహుల్ వివరించాలన్నారు. గురువారం చేసిన ప్రసంగంలో సాగు చట్టాలలోని ఒక్క క్లాజ్ గురించి కూడా ప్రసావించలేదని ఎద్దేవా చేశారు. వ్యవసాయ ఉత్పత్తుల మార్కెటింగ్ కమిటీలో సంస్కరణలను సమర్థించిన మాజీ ప్రధాని మన్మోహన్ సింగ్ వ్యాఖ్యలపై రాహుల్ నుంచి ఎలాంటి స్పందన లేదని ఆమె పేర్కొన్నారు.
ఇదీ చదవండి : 'రేడియో.. బంధాలను బలోపేతం చేసే అద్భుత సాధనం'
