'ఆ ఉద్దేశంతోనే రాహుల్​ విదేశీ పర్యటన'

దిల్లీ సరిహద్దుల్లో ఆందోళన చేస్తోన్న రైతులకు మద్దతు తెలిపిన సెలబ్రిటీలు, అంతర్జాతీయ ప్రముఖలు సహా కాంగ్రెస్​ అగ్రనేత రాహుల్​ గాంధీపై విమర్శనాస్త్రాలు సంధించింది భాజపా. భారత్​ వ్యతిరేక కథనాలు ప్రచారం చేస్తున్నారని ఆరోపించింది. భారత్​పై కుట్ర పన్నే ఉద్దేశంతోనే రాహుల్​ విదేశీ పర్యటన చేస్తారని ఆరోపించింది.

వ్యవసాయ చట్టాలకు వ్యతిరేకంగా ఆందోళన చేస్తోన్న రైతులకు మద్దతిస్తున్న సెలబ్రిటీలతో సహా పలువురు అంతర్జాతీయ ప్రముఖులపై విమర్శలు గుప్పించింది భాజపా. భారత్​కు వ్యతిరేకంగా నకిలీ కథనాలు ప్రచారం చేస్తున్నారని మండిపడింది. 'భారత్​ వ్యతిరేక ప్రచారం, నకిలీ కథనాలను ఎదుర్కొవడానికి మేమంతా ఏకమవుతాం' అని ట్విట్టర్​ వేదికగా ఆగ్రహం వ్యక్తం చేశారు భాజపా జాతీయ అధ్యక్షుడు జేపీ నడ్డా.

ఈ నేపథ్యంలోనే కాంగ్రెస్​ అగ్రనేత రాహుల్​ గాంధీపై విమనాస్త్రానాలు సంధించారు మరో భాజపా నాయకుడు సంబిత్​ పత్రా. దేశాన్ని వివాదాల్లోకి లాగే అంశాలతోనే రాహుల్​ విదేశీ పర్యటనలకు వెళ్తున్నారని ఆరోపించారు.

వారే రాహుల్​కు మద్దతుదారులు

"భారత్​ పరువు ఎలా తీయాలి? దేశాన్ని వివాదాల్లోకి ఎలా లాగాలి? అనే భారత వ్యతిరేక అంశాలతో కుట్ర చేయడానికి రాహుల్​ విదేశాలకు​ వెళ్తున్నారు" అని ఆరోపించారు. అంతర్జాతీయ పాప్​సింగర్​ రిహన్న, మాజీ అడల్ట్​ నటి మియా ఖలీఫా సహా భారత్​ వ్యతిరేక ప్రచార ట్వీట్లు చేసినవారే రాహుల్​తో మద్దతుగా నిలుస్తారని విమర్శించారు పత్రా. రాహుల్​ తన రాజకీయ ప్రయోజనాల కోసం రైతు నిరసనలను ఉపయోగించుకుంటున్నారని.. ప్రజలను ప్రేరేపిస్తున్నారని ఆరోపించారు. ఉద్యమాన్ని రాజకీయాలు చేయవద్దని రైతులు పేర్కొన్నప్పటికీ పరిపక్వత లేని రాహుల్​.. వారి తరఫున మాట్లాడటానికి ప్రయత్నిస్తునారని అన్నారు.

నియంతల పేర్లు 'ఎం' అక్షరంతో ఎందుకు మొదలవుతాయని రాహుల్ చేసిన ట్వీట్​పై విరుచుకుపడ్డారు పత్రా. మన్మోహన్​ సింగ్​, మహాత్మా గాంధీ పేర్లు కూడా 'ఎం' తోనే ప్రారంభమవుతాయన్నారు.

ఇదీ చూడండి: రైతులకు మద్దతుగా సీజేఐకి 141మంది లాయర్లు లేఖ