Rafale Fighter Jets: భారత్ అవసరాల మేరకు మరిన్ని రఫేల్ జెట్లు అందించేందుకు ఫ్రాన్స్ సిద్ధంగా ఉన్నట్లు ప్రకటించారు ఆ దేశ రక్షణ మంత్రి ఫ్లోరెన్స్ పార్లే. భారత్, ఫ్రాన్స్ ఒకే రకమైన ఆయుధాలు వినియోగించడం రెండు వ్యూహాత్మక భాగస్వామ్య దేశాల బలమైన బంధానికి అద్దం పడుతోందని ఆమె అన్నారు.
భారత్-ఫ్రాన్స్ సహకారంపై దిల్లీలో అనంత సెంటర్ నిర్వహించిన ఇంటరాక్టివ్ సెషన్లో పార్లే ఈ వ్యాఖ్యలు చేశారు.
మేక్ ఇన్ ఇండియాకు మద్దతు ఇచ్చేందుకు ఫ్రాన్స్ కట్టుబడి ఉన్నట్లు ఫ్లోరెన్స్ స్పష్టం చేశారు. ప్రపంచవ్యాప్తంగా భారతీయ ఉత్పత్తులకు ప్రోత్సాహం కల్పించనున్నట్లు పేర్కొన్నారు.
''రఫేల్ జెట్లతో భారత వాయుసేన సంతృప్తిగా ఉండటం పట్ల ఆనందంగా ఉంది. కరోనా సంక్లిష్ట సమయంలోనూ అనుకున్న సమయానికే 36 యుద్ధవిమానాలు భారత్కు అందించాం. ఇదో గొప్ప ఘనత.''
- ఫ్లోరెన్స్ పార్లే, ఫ్రాన్స్ రక్షణ మంత్రి
భారత్కు ఇప్పటివరకు 33 రఫేల్ జెట్లు అందించినట్లు ఫ్రాన్స్ రాయబార కార్యాలయం గురువారం తెలిపింది.
Rafale Deal Between India and France
ఫ్రాన్స్ నుంచి 36 రఫేల్ యుద్ధ విమానాల కొనుగోలుకు రూ.59వేల కోట్ల విలువైన ఒప్పందం 2016 సెప్టెంబర్లో చేసుకుంది భారత్. విమానాలను ఫ్రాన్స్కు చెందిన దసో ఏవియేషన్ సంస్థ తయారు చేస్తోంది. సుమారు నాలుగేళ్ల తర్వాత గతేడాది జులై 29న తొలి బ్యాచ్లో 5 రఫేల్లు భారత్కు చేరుకున్నాయి. సెప్టెంబర్ 10న వాయుసేన అమ్ములపొదిలో చేరాయి.
రెండో బ్యాచ్ 2020, నవంబర్ 3న మూడు రఫేల్లు భారత్కు చేరుకున్నాయి. మూడో బ్యాచ్లో మరో 3 రఫేల్లు 2021, జనవరి 27న వాయుసేనలో చేరాయి.
తొలి రఫేల్ స్క్వాడ్రాన్ను హరియాణాలోని అంబాలాలో ఏర్పాటు చేశారు. రెండో స్క్వాడ్రాన్ను బంగాల్లోని బసిమారాలో ఏర్పాటు చేసేందుకు ప్రణాళికలు చేస్తోంది వాయుసేన.
Rafale Deal Corruption
భారత్లోనూ రఫేల్ ఒప్పందం రాజకీయ వివాదంగా మారింది. ఇప్పటికీ మోదీ సర్కార్పై విపక్షాలు ముఖ్యంగా కాంగ్రెస్ ఈ అంశంపై విమర్శనాస్త్రాలు సంధిస్తూనే ఉన్నాయి. ఈ వ్యవహారంపై పార్లమెంటులోనూ దుమారం చెలరేగింది. సుప్రీంకోర్టులోనూ రఫేల్ ఒప్పందానికి సంబంధించి పలు పిటిషన్లు దాఖలయ్యాయి.
భారత్తో రఫేల్ యుద్ధ విమానాల కొనుగోలు ఒప్పందం కుదిరేలా చూసేందుకు.. దసో ఏవియేషన్ సంస్థ భారీగా ముడుపులు ఇచ్చిందంటూ ఫ్రాన్స్కు చెందిన 'మీడియాపార్ట్' జర్నల్ నవంబర్లో సంచలన వార్త ప్రచురించింది. ఇందుకోసం బోగస్ ఇన్వాయిస్లు రూపొందించిందని వెల్లడించింది. దసో ఏవియేషన్.. ఓ మధ్యవర్తికి 7.5 మిలియన్ యూరోల(రూ. 64.32కోట్లు) ముడుపులను రహస్యంగా అందించేందుకు ఈ ఇన్వాయిస్లు ఉపయోగపడ్డాయని ఆరోపించింది. బోగస్ ఇన్వాయిస్కు సంబంధించిన పత్రాలు అందుబాటులో ఉన్నప్పటికీ, భారత దర్యాప్తు సంస్థలు విచారణ చేపట్టలేదని మీడియాపార్ట్ ఆరోపించింది.
మోదీ, రాజ్నాథ్తో భేటీ..
ఫ్లోరెన్స్ పార్లే ఈ రోజు ఉదయం భారత ప్రధాని నరేంద్ర మోదీతో భేటీ అయ్యారు.
అనంతరం.. రక్షణ మంత్రి రాజ్నాథ్ సింగ్తో సమావేశం అయ్యారు.
భారత్- ఫ్రాన్స్ బంధం మరింత బలంగా తయారైందని అన్నారు రాజ్నాథ్. భారత్- ఫ్రాన్స్ ద్వైపాక్షిక, ప్రాంతీయ, రక్షణ సంబంధిత అంశాలపై విస్తృత చర్చలు జరిపినట్లు ఆయన పేర్కొన్నారు.
ఇవీ చూడండి: రఫేల్: ఒప్పందమా? కుంభకోణమా?? అసలేం జరిగింది???
