భారత గణతంత్ర వేడుకలు అట్టహాసంగా సాగాయి. త్రివిధ దళాల సైనిక పాటవాల ప్రదర్శన అబ్బురపరిచింది. దేశ సైనిక సామర్థ్యాన్ని చాటేలా ఆయుధ సంపత్తిని సగర్వంగా ప్రదర్శించింది భారత్.
పదాతి దళం, నావికా దళం, వాయుసేన వరుసగా కవాతు నిర్వహించాయి.
పినాక మల్టీ బ్యారెల్ రాకెట్ లాంఛర్(ఎంబీఆర్ఎల్), బ్రహ్మోస్ క్షిపణులు పరేడ్లో ప్రత్యేక ఆకర్షణగా నిలిచాయి.
214 ఎంఎం పినాకా ఎంబీఆర్ఎల్ ప్రపంచంలోనే అత్యాధునిక రాకెట్ వ్యవస్థల్లో ఒకటి. ఇది.. లక్ష్యాలను అతి తక్కువ కాలవ్యవధిలోనే ఛేదించగలదు.
బ్రహ్మోస్ క్షిపణి ప్రదర్శనకు కెప్టెన్ కమ్రుల్ జమాన్ నేతృత్వం వహించారు.
ఈ బ్రహ్మోస్ క్షిపణులను భారత్-రష్యా సంయుక్తంగా రూపొందించాయి. ఇది గరిష్ఠంగా 400 కి.మీ. దూరంలోని లక్ష్యాలను ఛేదించగలదు.
భారత ప్రధాన యుద్ధ ట్యాంకుల్లో ఒకటైన టీ-90 భీష్మ, పరేడ్కు కెప్టెన్ కరణ్వీర్ సింగ్ నేతృత్వం వహించారు. టీ-72 బ్రిడ్జ్ లేయర్ ట్యాంక్, బీఎంపీ-2 ఆర్మోర్డ్ పర్సనల్ క్యారియర్లు ఆకట్టుకున్నాయి.
ప్రీతి చౌదరి నేతృత్వంలో..
140 ఎయిర్ డిఫెన్స్ రెజిమెంట్ కెప్టెన్ ప్రీతి చౌదరి షిల్కా వెపన్ సిస్టమ్కు నాయకత్వం వహించారు. గణతంత్ర వేడుకల్లో పదాతి దళం నుంచి పాల్గొన్న ఏకైక మహిళా కమాండర్గా నిలిచారు.
షిల్కా వెపన్ సిస్టమ్.. అత్యాధునిక రాడార్, డిజిటల్ ఫైర్ కంట్రోల్ కంప్యూటర్స్ కలయికతో తయారైంది.
దేశంలోని తొలి ముగ్గురు మహిళా ఫైటర్ పైలట్లలో ఒకరైన ఫ్లైట్ లెఫ్టినెంట్ భావనా కాంత్ యుద్ధ విమానాల సైనిక విన్యాసాల్లో పాల్గొన్నారు.
స్వర్ణిమ్ విజయ్ వర్ష్ ఇతివృత్తంతో..
గణతంత్ర దినోత్సవ పరేడ్లో స్వర్ణిమ్ విజయ్ వర్ష్ థీమ్‌తో నావికాదళం పాల్గొంది. బంగ్లాదేశ్‌ యుద్ధ సమయంలో సేవలందించిన ఐఎన్‌ఎస్‌-విక్రాంత్‌ విమాన వాహక నౌకను నావికాదళం ప్రదర్శించింది.
