ఇండో-పసిఫిక్ ప్రాంతాల్లో శాంతి, స్థిరత్వం, శ్రేయస్సు కోసం క్వాడ్ దేశాలు మునుపటి కంటే రెట్టించిన ఉత్సాహంతో కలిసికట్టుగా పనిచేస్తాయని ప్రధానమంత్రి నరేంద్ర మోదీ అన్నారు. శాంతి నెలకొల్పడంలో క్వాడ్ దేశాల పాత్ర కీలకమన్నారు. ప్రపంచాన్ని ఒకే కుటుంబంలా భావించే 'వసుదైవ కుటుంబకం' అనే సూత్రాన్ని నమ్ముతానని తెలిపారు.
భారత్, అమెరికా, జపాన్, ఆస్ట్రేలియా దేశాలు సంయుక్తంగా ఏర్పాటు చేసిన చతుర్భుజ కూటమి(క్వాడ్) సదస్సుకు వర్చువల్గా హాజరై ప్రసంగించారు మోదీ.
క్వాడ్ దేశాలతో చర్చకు చొరవ చూపిన అమెరికా అధ్యక్షుడు జో బైడెన్కు కృతజ్ఞతలు తెలిపారు మోదీ. ప్రజాస్వామ్య విలువలతో నాలుగు దేశాలు ఏకమయ్యాయని గుర్తుచేశారు. ఇండో-పసిఫిక్లో శాంతి, సుస్థితరకు నాలుగు దేశాలు కట్టుబడి ఉంటాయని అన్నారు. కరోనా, ఆర్థిక సంక్షోభం వంటి కీలక అంశాలపై మాట్లాడారు.
'సంయుక్తంగా పనిచేసేందుకు సిద్ధం'
క్వాడ్ దేశాలతో సంయుక్తంగా పనిచేసేందుకు అమెరికా కట్టుబడి ఉంటుందని ఆ దేశ అధ్యక్షుడు జో బైడెన్ అన్నారు. ఇండో-పసిఫిక్లో సుస్థిరతను నెలకొల్పడమే లక్ష్యమని క్వాడ్ దేశాల వర్చువల్ సదస్సులో పేర్కొన్నారు. ఎలాంటి సమస్య ఎదురైనా ఆచరణాత్మక పరిష్కారాలు వెతకడం వల్ల కూటమికి చాలా ప్రాముఖ్యత ఉందని అన్నారు. మరికొన్ని ఏళ్లపాటు ఈ బంధాన్ని కొనసాగించాలనే ఆలోచనలో ఉన్నట్లు బైడెన్ పేర్కొన్నారు.
'ఎమోషనల్గా ఫీలయ్యా'
ఇండో-పసిఫిక్ ప్రాంతాల శాంతి, సుస్థిరతకు జపాన్ సహకారం ముందస్తుగానే ఉంటుందని ఆ దేశ ప్రధాని యొషిహిదె సుగా అన్నారు. క్వాడ్ సదస్సును ఎమోషనల్గా ఫీల్ అయినట్లు పేర్కొన్నారు. కొవిడ్-19 కట్టడికి నాలుగు సభ్య దేశాలు కృషి చేయడం ముఖ్యమని అన్నారు.
2011లో జపాన్లో భూకంపం సంభవించినప్పుడు క్వాడ్ దేశాలు చేసిన సహాయాన్ని గుర్తుచేసుకున్నారు సుగా. భారత్, ఆస్ట్రేలియా, అమెరికా అధినేతలకు కృతజ్ఞతలు తెలిపారు.
'ప్రపంచగతిని మార్చే శక్తి'
21వ శతాబ్దంలో ఇండో పసిఫిక్ ప్రాంతానికి ప్రపంచదేశాల గతిని మార్చేశక్తి ఉందన్నారు ఆస్ట్రేలియా ప్రధాని స్కాట్ మారిసన్. నాలుగు గొప్ప ప్రజాస్వామ్యదేశాల నాయకులు.. శాంతి, సుస్థిరత, దేశాల శ్రేయస్సు కోసం కలిసికట్టుగా పనిచేయాలని అన్నారు.
ఇదీ చదవండి:వీరప్ప మొయిలీకి సాహిత్య అకాడమీ పురస్కారం
