Punjab Blast: పంజాబ్ మొహలీలోని పోలీస్ నిఘా విభాగం హెడ్క్వార్టర్స్పై సోమవారం రాత్రి దాడి జరిగింది. దుండగులు రాకెట్ ఆధారిత గ్రనేడ్తో పేలుడుకు పాల్పడినట్లు అధికారులు తెలిపారు. భవనంలోని ఓ అంతస్తులో కిటికీలు ధ్వంసమైనట్లు వెల్లడించారు. అయితే.. ఎవరికీ గాయాలు కాలేదని స్పష్టం చేశారు.
రాత్రి 7.45 గంటల సమయంలో ఈ ఘటన జరగ్గా.. అప్రమత్తమైన పోలీసులు భద్రతను కట్టుదిట్టం చేశారు. ఈ ఘటనపై ఎఫ్ఐఆర్ నమోదు చేయనున్నట్లు తెలిపారు. నిందితులను పట్టుకునేందుకు గాలింపు చేపట్టినట్లు వివరించారు. దాడి వెనుక ఉగ్రకుట్ర దాగి ఉందా అన్న కోణంలోనూ దర్యాప్తు చేయనున్నట్లు పోలీసులు వెల్లడించారు. మరోవైపు పంజాబ్ డీజీపీతో మాట్లాడిన సీఎం భగవంత్ మాన్.. ఘటనపై సమగ్ర నివేదిక కోరారు.
''ఎస్ఏఎస్ నగర్ సెక్టార్ 77లోని పంజాబ్ పోలీస్ హెడ్క్వార్టర్స్లో రాత్రి 7.45 గంటల సమయంలో చిన్న పేలుడు సంభవించింది. అయితే.. ఎలాంటి ఆస్తి, ప్రాణనష్టం జరగలేదు. సీనియర్ అధికారులు ఘటనా స్థలానికి చేరుకున్నారు. దీనిపై దర్యాప్తు జరుగుతోంది. ఫోరెన్సిక్ బృందాలను కూడా పిలిచాం.''
- మొహలీ పోలీసుల ప్రకటన
రంగంలోకి ఎన్ఐఏ: పేలుడు కేసుపై ఎన్ఐఏ రంగంలోకి దిగింది. సంఘటనా స్థలాన్ని పరిశీలించిడానికి దర్యాప్తు బృందం మంగళవారం.. మొహలీకి వెళ్లే అవకాశాలున్నాయని సంబంధిత వర్గాలు తెలిపాయి. ఈ కేసులో సమాచారాన్ని రాబట్టేందుకు.. దర్యాప్తు సంస్థకు చెందిన టెర్రర్ ఇంటెలిజెన్స్ యూనిట్ తీవ్రంగా ప్రయత్నిస్తోందని వివరించాయి.
ఇదీ చదవండి: దివ్యాంగ చిన్నారికి విమానంలో నో ఎంట్రీ.. కేంద్రమంత్రి ఫైర్.. దిగొచ్చిన ఇండిగో!
