PUBG Addiction: పబ్జీ ఆటలో పడి పిల్లలు ఏం చేస్తున్నారో అర్థం కావడం లేదు. దానికి బానిసలుగా మారుతున్నారు. ఇదే ఆట మోజులో పడి సొంత ఇంట్లో నుంచే రూ. 8 లక్షలు కాజేసి మరొకరికి ఇచ్చారు అన్నదమ్ములు. అసలు విషయం తెలిసి వాళ్ల తండ్రి షాకయ్యాడు.
వివరాల్లోకి వెళ్తే.. తమిళనాడు చెన్నైలోని టేనంపేట్ ప్రాంతానికి చెందిన నటరాజన్కు ఇద్దరు కుమారులు. 10,12వ తరగతి చదువుతున్నారు. కిరాణా దుకాణం నడిపే నటరాజన్.. కొత్త ఇల్లు కొందామని రూ. 8 లక్షలు షాప్లో రహస్యంగా దాచాడు. కొద్దిరోజులకు ఆ డబ్బు మాయమైంది.
పోయిన డబ్బు గురించి అనుమానంతో కుమారులనే పలుమార్లు అడిగాడు నటరాజన్. చివరకు వాళ్లే తీసినట్లు ఒప్పుకున్నారు.
ఏం చేశారంటే..?
PUBG Addiction 8 Lakhs Stolen: రూ. 8 లక్షలు ఏం చేశారని తండ్రి నిలదీయగా అసలు విషయం చెప్పారా అన్నదమ్ములు. పబ్జీ బాగా ఆడే తమ 15 ఏళ్ల స్నేహితుడి కనెక్షన్ కోసం అతడికి ఇచ్చినట్లు తెలిపారు.
దీంతో తన డబ్బు కోసం స్థానిక పోలీస్ స్టేషన్లో ఫిర్యాదు చేశాడు నటరాజన్.
పోలీసులు నటరాజన్ కుమారుల స్నేహితుడిని ప్రశ్నించగా.. తన తల్లిదండ్రులకు ఇచ్చినట్లు చెప్పాడు.
తమ కుమారుడితో పబ్జీ ఆడేందుకు నటరాజన్ పిల్లలు.. ఎప్పుడూ ఇంటికి వస్తున్న విషయాన్ని గమనించారు రాజశేఖర్, పుష్పరాణి దంపతులు. ఇష్టమైన ఆహారం కావాలంటే డబ్బులు తీసుకురావాలని పబ్జీలో నిమగ్నమైన పిల్లలిద్దరినీ ఒప్పించారు. ఈ నేపథ్యంలోనే రూ. 8 లక్షలు వారికి ఇచ్చినట్లు తేలింది.
ప్రస్తుతం పరారీలో ఉన్న ఆ దంపతుల కోసం పోలీసులు గాలిస్తున్నారు.
PUBG banned in India:
వివిధ కారణాల రీత్యా భారత్లో నిషేధాన్ని ఎదుర్కొన్న పబ్జీ.. తిరిగి దేశంలో రీ ఎంట్రీ ఇచ్చింది. 'బ్యాటిల్గ్రౌండ్స్ మొబైల్ ఇండియా' పేరుతో వచ్చిన ఈ గేమ్ బీటా వెర్షన్ మోడ్.. జూన్ 17న యాప్ స్టోర్లో దర్శనమిచ్చింది.
నిషేధం ఇందుకే..
చైనాతో సరిహద్దు వివాదాల నేపథ్యంలో ఆ దేశానికి చెందిన అనేక యాప్స్పై భారత ప్రభుత్వం గతేడాది నిషేధం విధించింది. వాటిల్లో పబ్జీ ఒకటి. అయితే పబ్జీ ప్రత్యక్షంగా చైనా యాప్ కాదు. చైనా ఆధారిత టెన్సెంట్ సంస్థకు పబ్జీతో సంబంధం ఉండటం వల్ల యాప్ నిషేధానికి గురైంది. అనంతరం ఆ సంస్థ పబ్జీ కార్పొరేషన్ నుంచి తప్పుకుంది.
ఇవీ చూడండి: పబ్జీతో వ్యక్తిగత గోప్యతకే కాదు ఆరోగ్యానికీ ముప్పే!
