తన స్థానంలో కొత్తగా విధుల్లోకి చేరిన సొంత కుమార్తెకు దగ్గరుండి బాధ్యతలు అప్పగించారు ఓ తండ్రి. ఈ అరుదైన సన్నివేశానికి కర్ణాటక మండ్యలోని సెంట్రల్ పోలీస్ స్టేషన్ వేదికైంది. ఇప్పటివరకు ఆ ఠాణాకు సబ్ఇన్స్పెక్టర్గా ఉన్న బీఎస్ వెంకటేశ్ బదిలీ కాగా.. ఆ స్థానంలో ఆయన కుమార్తె బీవీ వర్షను ప్రభుత్వం నియమించింది. బుధవారం వర్షకు.. ఆమె తండ్రి వెంకటేశ్ ఛార్జ్ అప్పగించారు. మండ్య ఎస్పీ కార్యాలయానికి బదిలీపై వెళ్లారు. ఈ సమయంలో తండ్రీకూతుళ్లు భావోద్వేగానికి లోనయ్యారు.
సైన్యం నుంచి పోలీస్ శాఖకు..
వెంకటేశ్.. తుమకూరు జిల్లా హులియుర్దుర్గ వాసి. 16 ఏళ్లపాటు సైన్యంలో సేవలు అందించారు. కార్గిల్ యుద్ధంలోనూ దేశం కోసం పోరాడారు. సైన్యం నుంచి రిటైర్ అయ్యాక కర్ణాటకకు తిరిగివచ్చారు. పోలీస్ నియామక పరీక్ష రాసి.. మిలటరీ కోటాలో సబ్ఇన్స్పెక్టర్ ఉద్యోగం సాధించారు. మండ్య, మైసూరు, కొడగు, చామరాజనగర్ జిల్లాల్లో విధులు నిర్వర్తించారు. ఏడాదిన్నర నుంచి మండ్య సెంట్రల్ స్టేషన్లో ఎస్ఐగా పని చేస్తున్నారు.
తండ్రి బాటలో కుమార్తె..
వెంకటేశ్ కుమార్తె వర్ష ఎంఏ ఎకనామిక్స్ చదివారు. వృత్తి విషయంలో తండ్రి బాటలోనే పయనించారు. పోలీస్ నియామక పరీక్ష రాసి ఎస్ఐ ఉద్యోగానికి ఎంపికయ్యారు. 2022 బ్యాచ్లో కలబురిగిలో శిక్షణ పూర్తి చేసుకున్నారు. మండ్యలో ఏడాదిపాటు ప్రొబేషనరీ ఆఫీసర్గా పని చేశారు. ఆమెకు తొలి పోస్టింగ్గా.. తండ్రి వెంకటేశ్ చేస్తున్న పోలీస్ స్టేషన్కు సబ్ఇన్స్పెక్టర్గా నియమించింది ప్రభుత్వం.
మండ్య ఎస్పీ కార్యాలయానికి బదిలీపై వెళ్తున్న వెంకటేశ్.. బుధవారం వర్షకు అధికారికంగా సెంట్రల్ పోలీస్ స్టేషన్ ఎస్ఐ బాధ్యతలు అప్పగించారు. ఈ అరుదైన సన్నివేశాన్ని ఆ ఠాణా సిబ్బంది ఎంతో ఆసక్తిగా తిలకించారు. వెంకటేశ్, వర్ష ఆనందబాష్పాలు రాల్చారు. వ్యక్తిగత జీవితంలో గతంలో ఎదుర్కొన్న సవాళ్లను గుర్తుచేసుకున్నారు.
"నేను సైన్యంలో పని చేశాను. అందుకే కుటుంబంతో ఎక్కువ సమయం గడపలేకపోయాను. పిల్లల్ని దగ్గరుండి సరిగా చదివించలేకపోయాను. నా కుమార్తెను ప్రభుత్వ పాఠశాలలో నా భార్యే చదివించింది. ఇప్పుడు ఈ పోస్టులోకి నా కూతురు రావడం ఎంతో సంతోషకరం. అందుకే నాకు ఆనందంతో కన్నీళ్లు వస్తున్నాయి" అని అన్నారు వెంకటేశ్.
'వారి కష్టాలు చూస్తూ పెరిగా'
"చిన్నతనంలో నా తండ్రిని బాగా మిస్ అయ్యేదాన్ని. మా అమ్మే నన్ను ప్రభుత్వ బడికి పంపింది. నా తల్లిదండ్రుల కష్టాలు చూస్తూ నేను పెరిగాను. ఇప్పుడు తండ్రి స్థానంలోకి రావడం నాకు సంతోషంగా ఉంది" అని చెప్పారు వర్ష.
