కర్ణాటకలో మరాఠా అభివృద్ధి ప్రాధికార (డెవలప్మెంట్ కార్పొరేషన్) సంస్థ ఏర్పాటు చేస్తున్నట్లు రాష్ట్ర ప్రభుత్వం తీసుకున్న నిర్ణయాన్ని వ్యతిరేకిస్తూ కర్ణాటకలో బంద్ చేపట్టాయి కన్నడ అనుకూల సంఘాలు. బెంగళూరుతో పాటు పలు ప్రాంతాల్లో నిరసనలకు దిగాయి. ప్రభుత్వ నిర్ణయం కన్నడ ఐక్యతకు గొడ్డలిపెట్టు లాంటిదని కర్ణాటక రక్షణ వేదిక, కన్నడ చలువళి, కన్నడ ఒక్కూటా వంటి సంఘాలు మండిపడ్డాయి.
బెంగళూరు టౌన్హాల్ వద్ద పెద్ద సంఖ్యలో కన్నడీగులు చేరి ఆందోళనలు చేపట్టారు. ప్రభుత్వానికి వ్యతిరేకంగా నినాదాలు చేశారు. వారిని పోలీసులు అడ్డుకోగా.. ఉద్రిక్త వాతావరణం నెలకొంది. పలువురు కార్యకర్తలను అదుపులోకి తీసుకుని అక్కడి నుంచి తరలించారు పోలీసులు. అలాగే.. చామరాజనగర్, బెంగళూరు రూరల్, గదగ్, కొప్పా, హస్సాన్, రామనగర్, చిత్రదుర్గా, దవాంజెర్, బగల్కోట్, చిక్కమగలూరు, మాండ్య సహా ఇతర జిల్లాల్లో ఆందోళనలు చేపట్టారు. కన్నడ ఆర్గనైజేషన్స్లోని భాగస్వామ్య సంస్థలు.. ప్రభుత్వానికి వ్యతిరేకంగా శనివారం సాయంత్రం బెంగళూరులోని టౌన్ హాల్ నుంచి ప్రీడమ్ పార్క్ వరకు ర్యాలీ నిర్వహించాలని నిర్ణయించాయి.
ఈ క్రమంలో భారీ బందోబస్త్ ఏర్పాటు చేశారు పోలీసులు. బెంగళూరుతో పాటు ఇతర ప్రాంతాల్లో బలగాలను మోహరించారు.
బంద్ నేపథ్యంలో బెంగళూరులోని శివాజీ నగర్లో నిర్మానుష్య దృశ్యాలు కనిపించాయి. నగరంలోని బాలగంగాధరనాథ స్వామీజీ, మగాడి రోడ్ మెట్రో స్టేషన్లలో జనసంచారం కనిపించలేదు. హుబ్లీ నగరంలో బంద్ ప్రభావం పాక్షికంగానే ఉంది. రోడ్లపై ప్రజారవాణా సాధారణంగానే కనిపించినప్పటికీ.. జనాల తాకిడి లేదు.
సీఎం వినతి..
మరాఠా అభివృద్ధి సంస్థ ఏర్పాటును వ్యతిరేకిస్తూ పిలుపునిచ్చిన బంద్ను విరమించుకోవాలని శుక్రవారం కన్నడ అనుకూల సంఘాలను కోరారు రాష్ట్ర ముఖ్యమంత్రి యడియూరప్ప, హోంమంత్రి బసవరాజ్ బొమ్మాయ్. బలవంతంగా వాణిజ్య సముదాయాలను మూసివేయాలని చూస్తే.. కఠిన చర్యలు తప్పవని హెచ్చరించారు.
ఇదీ చూడండి:సీఎం ప్రకటనతో కర్ణాటకలో 'మరాఠా' చిచ్చు
