Prisoner Escaped In Agra Uttar Pradesh : ఉత్తర్ప్రదేశ్.. ఆగ్రాలో విచిత్ర ఘటన జరిగింది. జైలు నుంచి కోర్టులో హాజరుపరచడానికి తీసుకెళ్లిన ఓ నిందితుడు.. కానిస్టేబుల్కు పూటుగా మద్యం తాగించి తప్పించుకున్నాడు. ఈ విషయం తెలిసిన పోలీసు ఉన్నతాధికారులు కానిస్టేబుల్ను సస్పెండ్ చేశారు. పరారీలో ఉన్న నిందితుడి కోసం గాలింపు చర్యలు చేపట్టారు.
ఇదీ జరిగింది.. సీతాపుర్ జిల్లా నైమిశారణ్య పోలీస్ స్టేషన్ పరిధిలోని రాంపుర్ గ్రామానికి చెందిన ఫుర్కాన్ అనే వ్యక్తిని దొంగతనం కేసులో అరెస్టు చేసి జైలుకు పంపారు. శుక్రవారం కోర్టులో హాజరుపరిచారు. కోర్టుకు తీసుకొచ్చిన ఇతర ఖైదీలను మళ్లీ జైలుకు తరలించారు. కానీ ఫుర్కాన్, అతడితో ఉన్న కానిస్టేబుల్ ఉమానాథ్ శ్రీవాస్తవ తిరిగి జైలుకు వెళ్లలేదు. దీనిపై సమాచారం అందుకున్న పోలీసులు.. వీరి కోసం గాలింపు ప్రారంభించారు. ఈ క్రమంలో స్టేషన్ సమీపంలో కానిస్టేబుల్ ఉంటున్న అద్దె గది వద్దకు జైలు లాకప్ ఇంఛార్జ్, పోలీసులతో వెళ్లారు. అక్కడి వెళ్లిన పోలీసులు కంగుతిన్నారు. కానిస్టేబుల్ మద్యం మత్తులో పడి ఉన్నాడు. ఫుర్కాన్ అక్కడి నుంచి తప్పించుకున్నాడు. దీంతో లాకప్ ఇన్ఛార్జ్ ఉన్నతాధికారులకు సమాచారం అందించాడు.
ఈ విషయమై కానిస్టేబుల్ను విచారించగా.. మద్యం మత్తు అతడు ఏమీ చెప్పలేదు. దీంతో అతడిని జిల్లా ఆస్పత్రికి తరలించారు. అయితే, ఫుర్కాన్, అతడి సహచరులు కోర్టు వద్ద కానిస్టేబుల్ను కలిశారని.. మద్యం కొనిస్తానని చెప్పి తప్పించుకోడానికి వారు పథకం రచించినట్లు పోలీసులు ప్రాథమికంగా భావిస్తున్నారు. మద్యం, మాదక ద్రవ్యాలకు బానిసైన కానిస్టేబుల్.. ఖైదీని తన గదికి తీసుకెళ్లాడని అనుమానిస్తున్నారు. ఈ ఘటనపై ఉన్నతాధికారులు ఖైదీని పట్టుకోవడానికి మూడు గాలింపు బృందాలను రంగంలోకి దించారు. కేసు నమోదు చేసి.. కానిస్టేబుల్ను సస్పెండ్ చేశారు. శుక్రవారం మధ్యాహ్నం ఈ ఘటన జరగ్గా.. సాయంత్రం 6 గంటల వరకు బయటకు రాలేదని పోలీసులు తెలిపారు. అర్ధరాత్రి వరకు ఖైదీ ఆచూకీ లభించకపోవడం వల్ల తూర్పు ఏఎస్పీ నృపేంద్ర కుమార్ ప్రకటన విడుదల చేశారు.
వాష్రూమ్కు వెళ్లొస్తానని చెప్పి దొంగ పరార్
ఆరుగురిలో ఓ నిందితుడు పరారీ.. ఆస్పత్రిలో పోలీసుల కళ్లుగప్పి..!
