కరోనా మహమ్మారి విజృంభణతో అత్యావశ్యకంగా మారాయి పల్స్ ఆక్సీమీటర్, బీపీ మానీటరింగ్ మిషన్, నెబ్యులైజర్లు. వాటి ధరలు వేలు, లక్షల్లో పలికాయి. అయితే.. ప్రస్తుత అత్యవసర పరిస్థితుల్లో కీలకమైన ఈ పరికరాలను అందుబాటు ధరల్లో ఉంచేందుకు కేంద్రం కీలక నిర్ణయం తీసుకున్నట్లు కేంద్ర రసాయన, ఎరువుల మంత్రిత్వ శాఖ తెలిపింది. ట్రేడ్ మార్జిన్పై ఆంక్షలు విధించిన నేపథ్యంలో గత మంగళవారం నుంచి ఈ వైద్య పరికరాల ధరలు 88 శాతం వరకు దిగొచ్చినట్లు పేర్కొంది.
పల్స్ ఆక్సీమీటర్, బీపీ మానీటరింగ్ మిషన్, నెబ్యులైజర్, డిజిటల్ థర్మోమీటర్, గ్లూకోమీటర్లపై ట్రేడ్ మార్జిన్ను 70 శాతానికి పరిమితం చేయాలని 2021, జులై 13న జాతీయ ఔషధ ఉత్పత్రుల ధరల నియంత్రణ సంస్థ(ఎన్పీపీఏ) నోటిఫికేషన్ ఇచ్చినట్లు తెలిపింది.
" డిస్ట్రిబ్యూటర్ ధరల్లో ట్రేడ్ మార్జిన్ను 70 శాతానికి పరిమితం చేశారు. 2021, జులై 23 నాటికి 684 బ్రాండ్ల వైద్య పరికరాలు నమోదు కాగా.. 620 (91 శాతం) పరికరాల ఎంఆర్పీ ధరలను ఆయా సంస్థలు సవరించాయి. దిగుమతి చేసుకున్న పల్స్ ఆక్సిమీటర్ల ధరలో గరిష్ఠంగా తగ్గినట్లు తెలుస్తోంది. సాధారణ ఆక్సీమీటర్ (ఫింగర్ టిప్) 88 శాతం.. ఇతర కేటగిరీ ఆక్సీమీటర్ ధరలు 47 శాతం తగ్గాయి. అదే విధంగా బీపీ మిషన్ల ధరలు 83 శాతం దిగొచ్చాయి. నెబ్యులైజర్, డిజిటల్ థర్మోమీటర్ 77 శాతం, గ్లూకోమీటర్ ధర 80 శాతం వరకు తగ్గింది. ఈ సవరించిన ఎంఆర్పీ ధరలు 2021, జులై 20 నుంచే అమలులోకి వచ్చాయి. ఇవి అన్ని బ్రాండ్లకు వర్తిస్తాయి. కచ్చితంగా అమలయ్యేలా చేసేందుకు వాటి వివరాలను రాష్ట్రాల ఔషధ నియంత్రణ విభాగాలకు తెలియజేశాం. "
- కేంద్ర రసాయన, ఎరువుల మంత్రిత్వ శాఖ.
ఈ ఐదు కీలక వైద్య పరికరాల ట్రేడ్ మార్జిన్పై పరిమితులు విధించేందుకు డీపీసీఓ-2013లో పార్యాగ్రాఫ్ 19 ప్రకారం ప్రత్యేక అధికారాలను వినియోగించింది ఎన్పీపీఏ. నోటిఫికేషన్ ప్రకారం సవరించిన ధరలు జులై 20 నుంచి అమలులో ఉంటాయి. కొవిడ్-19 అత్యవసర పరిస్థితుల్లో వైద్య పరికరాలను అందుబాటు ధరల్లో ఉంచేందుకు ఈ నిర్ణయం తీసుకున్నట్లు ఎన్పీపీఏ తెలిపింది.
ఇదీ చూడండి: 'తగ్గిన ఆక్సిజన్ కాన్సంట్రేటర్ల ధరలు'
