నగరాలు, ఊర్ల పేర్లు మార్చే సంస్కృతి ఉత్తర్ప్రదేశ్ నుంచి మహారాష్ట్రకూ విస్తరించినట్టు కనపడుతోంది. ఔరంగాబాద్ పేరు మార్చాలన్న శివసేన ప్రతిపాదనతో 'మహా' రాజకీయాలు వేడెక్కాయి. మహా వికాస్ అఘాడీ ప్రభుత్వంలోని శివసేన, కాంగ్రెస్, ఎన్సీపీ మధ్య చిచ్చు రేగింది. ఈ పరిణామాలు ఎక్కడికి దారితీస్తాయనేది ఉత్కంఠగా మారింది.
ఔరంగాబాద్తో..
ఈ పేర్ల మార్పు వ్యవహారం ముందుగా ఔరంగాబాద్తో మొదలైంది. ఇప్పటివరకు ఉన్న ఆ పేరును సంభాజీనగర్గా మార్చాలని శివసేన ప్రతిపాదించింది. ఇది పార్టీ వ్యవస్థాపకుడు బాల్ఠాక్రే కలగా అభివర్ణించింది.
శివసేన ప్రతిపాదనపై మహారాష్ట్ర కాంగ్రెస్ అధ్యక్షుడు బాలాసాహెబ్ థోరట్ మండిపడ్డారు. ఇలా పేర్లు మార్చే ప్రక్రియకు తాము వ్యతిరేకమని తేల్చిచెప్పారు.
ఇదీ చూడండి:- బెయిల్పై బయటికొచ్చి చిన్నారిపై హత్యాచారం
కూటమిలో మరో పార్టీ అయిన ఎన్సీపీ కూడా శివసేన నిర్ణయంతో విభేదించింది. ఈ ప్రతిపాదనను 20ఏళ్ల క్రితమే తిరస్కరించామని.. ఇప్పుడూ అదే చేస్తామని స్పష్టం చేసింది.
సమాజ్వాదీ పార్టీ కూడా శివసేనకు తీవ్ర హెచ్చరికలు జారీ చేసింది. ఇలాంటి పనులతో ప్రజల మధ్య మధ్య చిచ్చుపెట్టొదని హితవు పలికింది.
ఈ పూర్తి వ్యవహారంలో మరో కొత్త కోణాన్ని బయటకు తీసుకొచ్చింది ప్రతిపక్ష భాజపా. ఔరంగాబాద్ పురపాలక ఎన్నికల వేళ శివసేన ఈ ప్రతిపాదన చేసిందని.. ఓట్ల కోసం ప్రజల మనోభావాలపై రాజకీయం చేస్తోందని విరుచుపడింది.
లెక్క చేయని శివసేన..
అయితే ఇవేవీ లెక్క చేయని శివసేన.. రాష్ట్రంలోని మరికొన్ని ప్రాంతాల పేర్లను మార్చేందుకు సన్నద్ధమవుతోంది. ఔరంగాబాద్ ఎయిర్పోర్ట్ను ఛత్రపతి సంభాజీ మహారాజ్ ఎయిర్పోర్ట్గా, పుణెను జిజాపుర్గా, ముంబయి సెంట్రల్ను నానా శంకర్సేఠ్ స్టేషన్గా పేరు మార్చాలని యోచిస్తోంది. ఔరంగాబాద్ ఎయిర్పోర్ట్ విషయంలో స్వయంగా ముఖ్యమంత్రి ఉద్ధవ్ ఠాక్రేనే పౌర విమానయాన శాఖ మంత్రికి లేఖ రాయడం గమనార్హం.
మరోవైపు పేర్లు మార్పు చిచ్చుపై ఇప్పటికే ఊహాగానాలు జోరందుకున్నాయి. కూటమిలోని పార్టీలకు పడటం లేదని పుకార్లు బయటకువచ్చాయి. అయితే తమ మధ్య ఎలాంటి గొడవలు లేవని మూడు పార్టీల నేతలు చెబుతున్నారు.
ఇదీ చూడండి:- పీఎంసీ కేసులో సంజయ్ రౌత్ భార్య విచారణ
