తమిళనాడులోని కాంచీపురం జిల్లా శ్రీపెరంబుదూర్ ప్రాంతంలో ఓ చైన్ స్నాచర్ కలకలం సృష్టించాడు. తుపాకీతో కాల్పులు జరిపి స్థానికులను భయాందోళనలకు గురిచేశాడు. చివరికి పోలీసులు జరిపిన ఎదురుకాల్పుల్లో మృతిచెందాడు. ఈ ఘటన ఆదివారం జరిగింది.
ఝార్ఘండ్కు చెందిన ముర్తాసా.. శ్రీపెరంబుదూర్లోని ఓ టోల్ ప్లాజా వద్ద ఓ 55 ఏళ్ల మహిళ గొలుసును దొంగిలించాడు. అనంతరం అతనితో పాటు వచ్చిన మరో వ్యక్తి నయీమ్ అక్తర్తో కలిసి పరారయ్యేందుకు ప్రయత్నించాడు. బాధితురాలి ఆరుపులతో స్థానికులు వారిని అడ్డుకునేందుకు ప్రయత్నించగా.. ముర్తాసా కాల్పులకు తెగబడ్డాడు. ఈ ఘటనలో ఎవరికీ ఎలాంటి ప్రమాదం జరగలేదు.
ఘటనాస్థలానికి చేరుకున్న పోలీసులు నిందితులను పట్టుకునేందుకు ప్రయత్నించగా.. వారిపై కూడా ముర్తాసా కాల్పులు జరిపాడు. పోలీసులు జరిపిన ఎదురుకాల్పుల్లో ముర్తాసా మృతిచెందాడు. మరో నిందితుడు నయీమ్ అక్తర్ను అరెస్ట్ చేశారు. నిందితుల నుంచి ఆయుధాలను స్వాధీనం చేసుకున్నారు.
ఈనెల 4న ఒరగదామ్లో జరిగిన కాల్పుల ఘటనకు వీరికి సంబంధం ఉందా? అన్న కోణంలో పోలీసులు దర్యాప్తు చేస్తున్నారు.
ఇదీ చూడండి : చదువంటే ఇంట్రెస్ట్ లేదని ఇళ్ల నుంచి పరార్.. చివరకు..
